Mainitong gidawat si Kim ug iyang kauban sa PBB kagahapong adlawa atol sa gipahigayon nga press conference human sa noontime show sa ABS-CBN nga ASAP.
Giatangan na usab ang pagahimoon unya niining mga palabas sa ABS-CBN hilabi na ang panagpares niini sa ambongang "Amboy Hottie" gikan sa General Santos nga si Gerald Anderson kinsa aminado gyud nga ganahan manguyab niya.
Tin-aw kaayo ang kaugmaon ni Kim sa natad sa showbiz kay karon pa lang sa gamay nga panahon, nakit-an na ang iyang katakos sa pagsayaw, pagkanta, ug pag-arte. Daghan pud na-impress niya tungod kay makamao kining molitok og Chinese Mandarin o Fukien. Bisan og tua pa kini sa sulod sa Bahay ni Kuya, nakahimo na si Kim og recording kauban ang pinakasikat ug multi-platinum band nga MYMP. Ang maong kantang nag-ulohan ug "Peng Yu" o Kaibigan sa Tagalog niariba gyud karon sa mga radyo sa tibook Pilipinas bisan pa ug aduna kini Chinese lyrics nga di masabtan sa uban.
Dili lang ang kaanyag ni Kim ang iyang mapasigarbo kon dili usab ang iyang karisma sa masa nga talagsaon lang para sa usa ka bag-ohan sa showbiz. Tungod niini, dili malikayan nga itandi siya kang Sandara Park kinsa inilang pambansang Krung-Krung sa Pilipinas. Mahinumduman nga si Sandara bisan pa og usa ka Koreana nakadawat ug suporta gikan sa masa kaniadtong panahon nga init pa ang Star Circle Quest bisan wala kini nakadaog sa maong star search, padayon kining gisuportaan sa masa. Bag-ohay pa lang nigawas ang iyang pelikulang D' Lucky Ones nga wala nabiyaan sa takilya. Karong padulong na sa pagka-sikat si Kim sa showbiz, nakaingon ang mga himantayon nga na-insecure si Sandara sa kasikat karon niini sa mga tawo ug daghang, nakaingon nga si Kim na ang bag-ong giidolo sa iyang mga fans.
Pero matud ni Kim, dili kono angayan nga itandi siya kang Sandara. Dugang pa niya nga dili ika-insecure si Sandara kaniya kay nauna kini sa showbiz ug siya bag-ohay pa lang siyang nagsugod ug mas sikat kini kaysa niya. Ingon pa niini nga maulaw siya kang Sandy mahitungod niining mga tsismis nga nigawas tali nilang duha og matud pang Kim, " di ko ganahan mosikat nga naa koy natamakan nga laing tawo."
Kon mahatagan ug higayon, sugot si Kim nga mamahimong anak ni PBB Celebrity Edition Big Winner Keanna Reeves sa usa ka pelikula. Matod niya usa ka dakong opurtunidad para niya ang maong talagsaong higayon nga makauban ang usa ka controversial nga bitoon sama ni Keanna. Ug malipay siya kon maninayon unya ang maong panghitabo.