Ang maong mga tinun-an sa pagka-inhinyero nga silang Bernard Fario (vocals), Dante Taactaac (guitar), Ronnel Bual (bass), Jose Condor, Jr. (drums), ug Rheggie Ybañez (keyboards) migamit sa maong termino-medical isip ngalan sa ilang banda nga ang buot ipasabot may kalabutan sa paglig-on sa cartilage nga usa ka matang sa tisyu sa lawas nga naghatod niini sa pagkagahi susamag bukog.
Ang Ossified! nagtoo nga pinaagi sa paghulam sa maong termino mabarugan niini ang usa ka hinugpong nga panawagan nga magmugna og musika ug batukan ang bisan unsa pa mang mga hagit nga monunut sa maong maisogong desisyon.
Lahi sa ubang mga sakop sa banda kansa nagsugod og tukar-tukar sa usa lamang ka kasilinganan, ang lima ka mga tinedyer misaysay nga nagkurus ang ilang mga agi-anan sa University of Cebu main campus. Ug diha sa usa sa mga yugto sa ilang panagbarkada, nanlipang ang pagkahilig sa pagpanukar sa dihang ilang nabatyagan nga aduna sila'y gisaw-ang taras: ang pagkamahiligon sa musika.
Si Fario, kansa maoy nibarog isip magsusulat, tigpamaba ug ang dako-dako sa grupo nagkanayon nga ilang nakat-onan gikan sa ilang maestro sa "Rizal's Life and Works" ang may kalabutan sa "ossification".
"Naganahan lang gyud mi sa sound sa ossified, nya astig pud kaayo paminawon maong among gibunyag sa grupo," pagpasabot ni Fario.
Nahibaw-an usab ning tagsulat sa usa ka pagpanuki-duki sa mga kahibalo sa Internet nga ang ossification usa ka proseso sa bone formation diin ang mga gitawag og connective tissues, sama sa cartilage maoy mahimong bukog. Ang maong nigahing cartilage maputos sa blood vessels nga may mga deposito sa minerales ug calcium nga maoy maghatud sa maong parte sa atong lawas sa pagka-"ossified".
Alang sa banda, ang ossified nagakahulugan usab og pagtinil og mga taras nga dili daling matumpag ug mga opinyon kansang kapuslanan gahing magupok kon ugaling silsilon na ug masohon sa mga pagsulay ug mga paghagit.
Matud pa ni Ms. Zarah Smith sa Handuraw Events Café, diin una nakong nakita ang usa ka linawas nga pasundayag sa tropang Ossified!, gihulagway niya si Fario nga makalingaw.
Makaingon usab ako nga nakatawag gayud og pagtagad ang mga layat-layat, kisi-kisi, hiyod-hiyod, ikid-ikid ug kirig-kirig nga daw nakuryentehan ni Fario nga masiawon kaayong moilog sa mikropono sa ubang nanganta, manglarot sa mga wire sa mga gadgets, mosapaw sa naggitara, ug magpakyut sa mga nanan-aw.
Pu'ng pa ni Fario nga kini wala niya buhata alang sa ikapikal sa uban, gani paagi kini niya nga makahatag og usa ka matang sa kalingawan sa tanang nagakapundok sa ngalan sa musika.
Bisan pa man sa iyang kasipat ug kakiat, wala kini nakapapas sa iyang "Hagtik sa Titik" nga oryentasyon diha's Lakandiwa, ang opisyal nga pamantalaan sa mga tinun-an sa UC.
Nakatungtong na susama'g yugo sa abaga ni Fario ang pagsulat sa mga berso, samtang ang uban sa Ossified! mao na ang bahala sa tono.
"Matag karon ug unya, mopuno mig pipila lang ka linya, pero amo na gyud nang gisangon tanan kang Fario kay siya man ang matawag og anak sa dagang," pamulong ni Rheggie.
Ang mamahimo puhon nga carrier track sa ilang gikugihan nga Extended Play album, nga may ulohan nga "Mad'a ra'g Smile", may titulo nga "Deep Pressed" nga nagtuki sa kasinatian may kalabutan sa usa ka romantikong panaglambigit nga nisangpot sa sitwasyong makalagot ug makamahay. Kini nagkanayon, "I hate being like this/sobra pa ka sa mga kurakot nga pulis/ I hate being like this/ baho pa ka sa mga basura ug sa mga ipis/ I've been in love and I've been hurt/di na ma-in love sa babaye nga flirt."
Gawas sa Deep Pressed, aduna usab sila'y laing duha ka mga kanta - ang "Ma'da ra'g Smile" ug "Bahawpenings" nga madungog ug ma-request sa 93.1 Smash FM, Martes ug Huwebes, 9:30-11:30 am sa tulumanong "YourVoice, YourChoice Tingog Kabataan" nga gidumala ni DJ Ram ug Bré Ambungan.
Isip panapos sa pakighinabi, nagkanayon silang Ronnel ug Dante nga kon duna silay mabantayan nga mokanta-kanta na usab sa ilang mga musikanhong mugna, anha pa sila makaingon nga aduna na gayud silay nakab-ot nga kalampusan sa ilang gisudlang natad sa arte.
Samtang si Jose, miapas-sumpay nga ang pinakadakong hagit karon kanila mao ang pagmugna og impresyon kon unsa gyud ang bandang Ossified!, ug ang pagkulit og usa ka direksyon nga maghatod kanila pagbilin og usa ka dakong kontribusyon sa local independent music making.
Susiha ang ubang impormasyon may kalabutan ning maong pundok nga maoy kinamanghoran sa tanang mga bandang Bisrock, nga aduna nay daghang sumusunod, sa ossified_bisrock@yahoo.com.