Ayawg Duda

Gikagubtan didto sa Amerika human mihipos og dili basta-basta nga pasidungog, kining maong duwa sa entablado giulohan og "Doubt" o Duda sa atong pinulongan. Ang sugilanon sa Doubt naglibot tali sa madre nga si Sister Aloysius ug pari nga si Fr. Flynn. Malampuson ug gikabuangan ang maong estorya hinungdan nga gikatakda kining ipasundayag sa 25 ka mga nasud.

Sinuwat ni John Patrick Shanley, ang Doubt maoy midaog isip 2005 Tony Award for Best Play. Gilangkat usab niini ang 2005 Pulitzer Prize ingon man miabanti usab kini aron pag-angkon sa New York Drama Critics Circle Award, Drama Desk, Outer Critics Circle, Drama League, Lortel and Obie Awards isip Best Play.

Ang estorya nahimugso sa usa ka Bronx Catholic School niadtong 1964, diin si Sr. Aloysius nagbaton og pagduda ngadto kang Fr. Flynn gumikan sa kasuod niini ngadto sa iyang altar boy. Nabutaan sa sayop nga pagtoo, ang pagduda ni Sr. Aloysius, dali nga naumol ngadto sa pagsupak hangtud nga mituyhakaw kini ngadto na sa paghukom. Apan tinuod ba gayud nga inosente si Fr. Flynn sa mga pagduda ni Sr. Aloysius? Dinhi mubutho ang tigi sa mga hunahuna ug opinyon. Ang mga eksena sigurado nga magbilin og mga pagduda ngadto usab sa hunahuna sa mga tumatan-aw busa bisan kon nahagbong na ang puting tabil padayon gihapon sila nga magdiskusyon.

Ang Doubt gikatakda nga ipasundayag na dinhi sa Sugbu pinaagi sa paningkamot sa Little Boy Productions karong Hunyo 30, Hulyo uno ug dos diha sa Onstage sa Ayala Cinema 1 sa Ayala Center Cebu. Si Cherrie Gil maoy modala sa papel ni Sr. Aloysius samtang si Niccolo Manahan mao si Fr. Flynn inubanan usab nila ni Jay Glorioso ug Cathy Azanza. - PR