Pahugyaw ni Mark

"Konting skin lang," kini maoy mapaabot sa mga fans ni Mark Bautista nga motan-aw sa iyang concert diha sa PanPhil Frasco Sports Complex sa Liloan karong gabii.

Ang lumad nga taga Cagayan nga si Mark mibutyag nga kasagaran sa iyang mga kanta karong gabii mao usay iyang giawit atol sa iyang malampuson nga first major solo concert didto sa Aliw Theater sa nakalabay nga buwan. Hinoon miingon siya nga angayang atangan ang usa ka Visayan song nga iyang gitun-an og maayo aron ikapadungog ngadto sa mga motan-aw sa concert.

Si Mark nga gitapuk-an sa mga sakop sa Cebu Entertainment Press didto sa Casa Verde kagahapon sa udto nangangkon nga 'zero" karon ang iyang lovelife. Subli niyang gipahayag nga dili tinood nga dunay nahitabo tali kanila ni Viva Hotbabe Ella V. sa dihang nagpasundayag sila didto sa nasud sa Japan ning bag-o lang. Gipahimug-atan niya nga kanunay nga daghang tawo sa iyang giistaran nga lawak didto ug walay higayon nga sila rang duha didto sa sulod sa nahisgutan nga hotbabe.

Sa nabalita na dinhi sa Banat Hugyaw niadtong nakalabay nga buwan, medyo pa-sexy na ang imahe ni Mark karon kinsa naila usab nga Pop Heartthrob. "Medyo mas wholesome before. Sa second album daring na, nag-mature na ang music." Apan iyang giklaro nga dili pa siya andam kon ugaling dunay tanyag aron mohimo siya og sexy movie. "No sexy movie. Huwag naman sana," pong pa niya dayong pahiyom.

Sa samang higayon gipalanog ni Mark nga nagka-istorya na silang tulo ni Rachelle Ann Go ug Christian Bautista, busa nadawat na niya ang kamatuoran tali sa duruha nga mao na karon ang dunay espesyal nga relasyon. 'Happy na ako for them," pasalig pa niya.

"I Need You," ang carrier single sa ikaduhang album ni Mark. Sa dihang gipangutana kon para kang kinsa ang maong awit, siya mitubag nga "kinanta ko siya from the heart. Pwede din for God." Laing kanta sa maong album ang "You Win the Game," busa gipangutana siya kon alang ba kini kang Christian nga maoy hingpit nga mibihag sa kasingkasing ni Rachelle. "Parang nagkataon lang."

Kauban ni Mark sa iyang concert karong gabii isip guest performers ang mga sugbuanon nga sila si Raffi Ouijano ug Johan Escanan. Samtang karong June 24 duna usay laing concert si Mark diha sa SM Cinema 2.