Wedding anniversary

Solemn apan alegre ang 25th wedding anniversary nila ni Tirso Cruz III ug Lynn Ynchausti niadtong milabay nga adlaw diin puro mga suod nga higala lang ug suod nga mga reporters ang mitambong.

Isalida karong hapon sa Startalk ug sa The Buzz ugma sa hapon ang nahitabong seremonyas nga gisaulog ni Rev. Dr. Cornelio Castillo nga suod usab sa magtiayon ug labihan ka komedyante hinungdan nga alegre ang kasal.

Suma pa sa PangMasa usa si Mayor Vilma Santos sa mga nangluhod sa kasal nga late miabot tungod kay nasaag siya hinungdan nga walay puas ang iyang pagpangayo ug pasaylo tungod kay mas nauna pa niya si Susan Roces ug ang iyang mismo bana nga si Senator Ralph Recto.

Si Rudy Fernandez (nga perteng baskoga murag wala masakit) maoy mihulip kang Senator Juan Ponce Enrile nga usa usab sa mga ninong apan wala makatambong.

Hinungdan nga si Ms. Poe, ug si Rudy ang nag-partner samtang si Rustom Padilla nga miabot kauban si Keanna Reeves ang partner usab ni Ate Vi. Laing nangluhod sa kasal mao ang magtiayong Christopher de Leon ug Sandy Andolong-de Leon. Si Jamie Rivera maoy mikanta sa "Lord, I Offer My Life To You" atol sa seremonya.

Daghan ang na-touched sa ceremony labi na dihang nagpictorial na ang tibuok pamilya ilabi na dihang gikantahan ni Tirso si Lyn og "Across My Heart."

Gretchen ug Lani nagbeso-beso

Tungod usab sa maong kasal nagkatapok usab ang suod nga managhigala nga sila si Rudy Fernandez, Phillip Salvador, Sen. Bong Revilla ug Sen. Jinggoy Estrada.

Late nga miabot si Lani Mercado (nga pag-umangkon ni Pip), tungod kay gikan pa siya sa taping sa "Moms" sa QTV 11 nga matud pa niya upat ka episodes ang gitingob nila og himo tungod kay molarga man sila ni Bong sa Hongkong kauban ang tibook pamilya alang usab sa ilang wedding anniversary.

Nahuman na ang seremonya sa dihang miabot ang manag-uyab nga sila si Tony Boy Cojuangco ug Gretchen Barretto nga nakiglamano pa nila ni Sen. Bong samtang nakigbeso usab si Bong ngadto ni Gretchen lakip na si Lani.

Usa ka audio-visual presentation ang gipasalida sa mga anak nila ni Pip ug Lyn nga sila TJ, Bodie ug Djanin hinungdan nga daling mikomedya ang ilang amahan nga motago na lamang siya basin og ibuking siya sa iyang mga anak.

Lakip sa mitambong sa kasal mao sila si Manay Ichu Maceda, Armida Siguion-Reyna, Carlitos and Bibeth Siguion-Reyna, Philip and April Cezar, Pinky de Leon, Isabel Rivas, Amy Austria and husband, Paul Cabral (nga maoy mihimo sa gown ni Lynn), Redgie Acuna-Magno of GMA Network, ang magsuong Andrea ug Rowena Bautista, Cass Ponti nga nahimong higala sa mga anak nila ni Tirso ug Lynn human sa unang "Pinoy Big Brother." - Ryan Mark