'Bakasi' ug 'Lansiao' gihukad sa Jimmycycle

JIMMELOU DACLISON. Kining nag-antipara nga milumpong sa pagkagitarista ug pagkavokalista mogitik sa kwerdas sa iyang bag-ong gitara (tungod kay ang iyang karaang instrumento iya mang gibunal nga naghatod sa pagkapusgay niini atol sa usa ka mainitong pasundayag sa Minglanilla) aron kahatagan og katagbawan ang mga sumusunod sa ilang mga kantang linawgaw nga giilang nagpasiugda sa pagkuyanap sa paningog nga Bisrock.

Si Jimmy mao ang tingog likod sa "Bakasi", usa ka Sugbuanon nga termino sa "eel", kansang sabaw giisip nga makapalagsik sa pagkalalaki. Hinungdan man gani nga naikag si Jimmy nga suwaton ang mga benepisyo sa paghigop og sabaw sa bakasi ug pagkaon sa unod niini nga nakahatag og tugob nga kalagsik ug lahutay sa natad sa pakighilawas.

EXPEDITO SIABOC. Ang bahista sa pundok mas gusto nga tawgong Choyex Doyek. Ug susama kang Jimmy masiawon usab niyang giyagyag dihas "Pilok sa Kanding", ang usa ka linawgaw nga pangantalita sa uban nga gusto gayud magpagamit og intimate adult toys, ug ang "Lansiao", nga laing matang sa sinabaw nga sud-an nga giisip nga makahatag og dugang kabaskog alang niadtong buot mahimong kampeyon sa sangka sa kama.

ARNIEL ONG. Mas pilion niyang tawgong Potenciano sa wa mabutyag nga hinungdan. Ang iyang pagpakang sa concave metal plates nakahatag og usa ka matang sa orgasmo matag jamming session ug linawas nga pasundayag.

Ang tulo ka mga tinun-an sa Cebu Institute of Technology nagkatapok ug nagkurambos og mugna og kanta ubos sa ngalang Jimmycycle ug giila nga usa sa mga pioneers sa Bisrock nga mga banda.

Ginamit ang mga impluwensiya sa Nirvana, Silverchair, Creed, Pearl Jam, Rivermaya ug Eraserheads, ang matag pasundayag sa Jimmycycle nahimong makalingaw ug tugob sa kinabuhi.

Sugdan nato kang Jimmy. Tawga siya'g Grungechy Boy. Unsa kaha ang nakapatukmod kaniya nga sudlon ang natad sa pagkanta? Sa usa ka pakighinabi, siya misaysay nga sa dihang diha pa siya sa grade school, usa ka higala mitudlo kaniya pagduyog pinaagi sa gitara. Usa usab siya ka sakop sa children's choir kaniadto.

Sa dihang diha na siya sa high school, nahimo siyang sakop sa usa ka banda sa ilang tulunghaan. Nanukar sila og mga covers sa mga kantang gipasikat sa Radiohead ug Eraserheads. Ug bisan pa man nga sa dihang ang E-heads ana-a sa kinapungkayan sa kasikat niadtong mga tungora, ang iyang dakong interes sa grunge music nga gipalambo sa bandang Nirvana, nahatod ning panahona ug nagpabiling kinaham niyang tipo sa musika.

Sa laing bahin, si Choyex gikan sa bandang "No Earth" ug matud pa nagsugod pagtukar sa bass guitar sa unang ang-ang sa kolehiyo. Siya nagkanayon nga kinaham gayud niya ang istilo sa mga kantang gipasikat sa NOFX, MxPx, Green Day, ug Blink 182. Gikahibalag ni Choyex silang Jimmy ug Potenciano sa usa ka pasundayag. Si Potenciano ug Jimmy maoy mingduol kaniya ug nangimbitar nga patukaron usab siya isip kauban sa tapok sa Jimmycycle. Tuod man nitunga si Choyex, apan atrasado na kining naabot sa ilang jamming session.

Ug sa dihang nakalaksi na og pagtagad ang Jimmycyle tungod sa mga makapatisngi nga dugukan sa ilang mga kanta, miapas na pud og pagsakmit og igo-igong requests ang "Peling Gwapa" ug "Kodigo". Ang nahauna may kalabutan sa mga babayeng sobra ra kaayo ang pagsalig sa kaugalingon nga nagtoo nga maanyag sila, gisimba ug gipantasya sa kalalakihan, samtang ang naawahi atake sa mga tawong tapulan nga mahiligon sa paggama og kodigo aron lang gayud makapasar sa usa ka pasulit o mga susama niini nga tumong ug tinguha.

Ang mga masabawong mga kanta sa Jimmycycle, gidihogan sa pag-uyon sa nagkabaga niining mga sumusunod, nakatukmod usab sa pagsulbong sa lain pang mga tracks sa album sama sa "Lostrid", "Barako", "Tomboy", ug "Emo Ako".

Ug niining tungora nagkanayon si Jimmy nga buot niyang ang Jimmycycle mahinumduman sa pagka-prangka ug pagkapintok sa mga mensahe sa ilang mga kanta tungod kay ila mang gipang-isa ang mga isyu nga dili sarang matuki kon ang atong katilingban padayong gawngan sa belo sa pagkatigpakaaron-ingnon.

Alang sa R18-rated nga lyrics ug website nga rated PG, mas pilion nako nga kamo na ang makasusi kon unsa ang ulohan sa ilang album nga mapalit sa Guerilla Wear Boutique, Mango Square Mall, Melrose Sports sa Raintree Mall ug A. Salonga Music Center sa SM City Cebu Mall. Susiha usab ang www.geocities.com/jimmycycle007 ug alang sa mga direct orders text 0917-6987722. Email o ipuno sila sa friendster: [email protected]