Mantequilla ug ang kinilaw nga "Bolinaw"

"Oh, kinilaw nga bolinaw, ikaw ang akong gihuna-huna; buntag, udto ug hapon, ikaw ang akong handumon; suka, sili ug luy-a, kinilaw'ng bolinaw," mao kining kantaha sa Mantequilla ang nakapalaksi pag-ayo sa pagtagad sa mga mahiligon sa musikang Bisrock tungod kay kinsa bang Bisdaka ang dili maglaway sa bolinaw nga naluto sa sukang paumbong, gisaktan sa gitagud-tagud nga luy-a ug sili, ug gisilbi sa pamaaging kinilaw nga maoy pagasawhan ipares sa bugnaw nga bahaw o dukot, ug sumsuman sa tubang bahal.

Nahimong dugukan sa kanta sa bandang Mantequilla ang bolinaw tungod sa mga naglugitom nga mga isyu nga ang maanindot nga kipot sa Tañon nga nag-uwang sa probinsya sa Sugbo ug Negros kawad-an na unya puhon sa isdang bolinaw kon madayon ang mga proyekto pagpangita og lana ug kaha pagtam-ok sa mga lapyahan aron kapalapdan ang yuta nga pagahimoong industrial zones kon kini mao na ang prioridad sa pangagamhanan sa ngalan sa kalambuan.

Kini mao ang sentimento nga nagpahipi diha sa kantang "Bolinaw", nga gisahugan sa musikanhong panglasa sa Mantequilla nga mga lumad nga taga Pinamungajan, usa ka lungsod nga nag-atubang sa Tañon, ug kansang lapyahan pagasaghiran sa mga balod sa maong kipot.

Ang Mantequilla gilangkoban nilang Cliff Jude Cocjin (vocals, tinun-an sa Computer Science sa Cebu Doctors University), Salipada "Lip-lip" Cerna (drums, nagtoon og Physical Therapy sa CDU), Neefrey Cocjin (lead guitar, mikuha sa kursong Radiologic Technology sa CDU gihapon), Jowell Rico (bass guitar, tinun-an sa kursong Electronics and Communications Engineering sa University of Cebu) ug si Ric Ryan "Doming" Cañada (lead guitar, estudyante sa kursong Electronics Technology dihas Cebu School of Science and Technology). Gawas kang Doming nga lumad taga Hilongos, Leyte, tulo ka sakop sa Mantequilla ang nakasaksi ug nagkasawo sa paglanay og pagtig-a sa mga damgo ug tinguha gikan pas ilang pagkabata isip tinun-an sa Sta. Monica Academy sa Poblacion, Pinamungajan. Bisan pa man gani og si Neefrey nag-una og bale'g usa ka tuig kanilang tulo, ana-a siya nakighugoy-hugoy tungod kay iya man nga manghod si Cliff Jude.

Ilang giangkon nga gikan sa pagka sipat nga mga tinedyer ngadto nas ilang pagsu-ong sa malisod nga kalibutan sa pagka musikero nga puno sa kompetensiya, pagsaway, ug pagsalindot, napamatud-an sa banda nga dakong tabang kanila nga sila karaang managhigala tungod kay ang ilang panaghinigalaay maoy nahimong gulugod nga naghatag og kusog sa ilang pagtaak sa kalibutan sa pagbanda kauban ang mga impluwensya sa Deftones, Korn ug Rage Against the Machine.

Sa usa ka gipahigayong pakighinabi sa pundok, nasayran nga nagsugod ang ilang banda-banda sa dihang sila manukar matag morning service sa ilang tulunghaan, nga ipahigayon pagkahuman sa flag-raising ceremony.

"Siyempre, pag run by sisters na-a man jud nay part after sa flag ceremony na we would sing praise music. Didto nagsugod ang among banda-banda," nagkanayon si Lip-lip, kansa midungag nga mao kadto ang nakapasubol sa iyang dakong hilig mopakang sa drums nga impluwensya sa iyang maguwang lalaki.

Sa dihang sila gipangutana kon nganong naabot sa ilang huna-huna ang maong ngalan sa banda, niasoy si Cliff Jude ug Neefrey nga lima ang ilang unang gipilian.

Napili nila ang Mantequilla tungod kay nindot kunong paminawon ang Espanyol sa "butter". Ug susama sa mga taras sa mantekilya, gipanag-ig sa pundok ang versatility sa banda nga gikan pagtukar og hardcore music pipila ka tuig ang milabay, karon adunay nahitabong transisyon ngadto sa Bisrock sound.

Tungod niining maong bersatilidad, daling nakab-ot sa grupo ang pagtipo-tipo sa ilang mga materyales nga naghatod sa pagkahuman pag-record sa usa ka 10-track album nga ilusad puhon sa Handuraw Events Café pipila ka adlaw gikan karon.

Gawas sa "Bolinaw", ang "LQ (Lovers Quarrel)" ug "Ibog-Ibog" duha sa mga kanta nga nakapalaksi sa pagtagad sa mga mahiligon sa romantikong dugukan sa mga kanta. Nakadawat kini og daghang airplay requests sa 93.1 Smash FM pinaagi sa tulumanong "YourVoice, YourChoice Tingog Kabataan" tungod kay gibubo man sa kolaborasyon nila sa maong mga kanta ang ilang mga kasinatian samtang sila misubay sa mga ang-ang nga sarang maagian kon ang usa ka nilalang naghupot ug nag-amping og usa ka romantikong relasyon.

Tino na nga may mga kasingkasing nang nalanay susamag mantekilya sa mga romantiko, madugkalon, ug mapangutan-ong mga linya sa LQ nga nagkanayon, "nganong sige man gyud ta og away, nganong dili ta magsinabtanay/ nganong wala man kay salig nako, undangon na lang ni nato/ngano kung ikaw ang sapoton, maabtan pag ugma usa maulian/ug ngano kung ako ang sapoton, gamay nimong gakos ako maulian."

Ang "Ibog-Ibog" may kalabutan sa mga "kilig moments" sa pundok isip mga tinedyer nga nakahibalag sa babaye nga ilang gipangdamgo, "Kung makakita ko nimo, makompleto gyud ang akong adlaw kay ikaw man ang akong kusog …. kung kahibaw lang ka nga ikaw ang babaye sa akong damgo/ kung kahibaw lang ka nga unsa ko kalipay kung makita tika/ kung ako magul-anon ikaw dayon ang pangitaon."

Ang ubang tracks nagsaysay sa gugma alang sa inahan, sama diha sa "Mama", ang dagway sa kayano dihas "Pobre" ug ang bugno sa padayong pagkinabuhi taliwala sa kawad-on diha sa "Manglilimos".

Angay usab nga kapasidunggan ang mugna ni Rayhoundz dihas disenyo sa album cover lakip na ang patuwad nga victory signs aron maporma ang M sa Mantequilla. Ang maong album nga may titulo gihapong Mantequilla gipahaum, gi-mix ug gi-master ni Paul Cañada sa Zzubu Recording Studio. Alang sa dungag nga kahibalo, suroy sa www.myspace.com/mantequilla2005. Email [email protected]. Alang sa bookings, tawagi si Cliff Jude sa 09174701262