Nahimuot ko sa nahitabo sa maong media forum, kay inay magkakauban unta sila si General Fusillero ug Mr. Pedro Abella, mora na man hinoon og nagka kontra sila sa maong forum, kay nagkapoliki na man hinoog panagang si Mr. Abella sa mga pasangil nilang General Fusillero, David Odilao ug Atty. Alforque nga, daw tinuod gyod nga kining mga taga DENR, duna gyo'y mga anomaliya, ug naangin pa ang taga City Assessors office, kay mihatag mag tax declaration sa usa ka buyer kono sa luna sa duol sa watershed area. Unta, wa may angayang tugotan pag-angkon og luna sa maong dapit diin, naangin na hinoon ang mga luna usab ni konsehal Gabby Leyson nga anaa mahimutang duol sa watershed.
Balik ngadtong Jun Tariman, bright sad kaayo siya, kay niadtong tungora sad, may presscon man sa Jonies Restaurant alang sa Little Big Star, so gidala ni Jun Tariman ang ubang mga taga ABS-CBN sa presscon ug mao na kono to'y iyang birthday celebration, madawat ninyo kana?
Mga bright ang mga batang winners sa Little Big Star ug si Sam Concepcion, nga guwapo maoy gikahinabi nako'g dugay. Sa akong pangutana kon hain ang iyang pili-on, pag-eskuyla ba o ang pag-artista, miingon siyang dili puwedeng papili-on siya, kay dili siya gustong moundang siya'g eskuyla, kay naglantaw sad siya sa ugma, ug dili sad puwedeng moundang siya pag-artista, kay gigasa kono ni Lord ang iyang talent busa dili mahimong dili gamiton aron maambitan sa tanan.
Namatikdan nako sa maong panagtigom ang kanhi columnist sa Lifestyle sa The Freeman, si Ronnie Matudan, dancer ug make up artist nga kaniadto pod, floor director sa usa ka show sa ABS-CBN, pero nawagtang, apan karon nabalik na sad diay siya. Balik-Kapamilya si Ronnie M. Welcome back. Member sad siya sa EMCI.