Mga pagdayeg ug mga pagsaway

Before anything else, mga pasalamat una ngadto sa mga Mandauehanon, labi na gyod ni Mayor Teddy Ouano, Mam Lollypop Ouano Dizon, ug sa super alalay nila [okay ra nimo'g tawgon ka la'g alalay?] nga si Mr. Rey Martinez sa ilang pagpagamit namo sa Session Hall diin didto gipahigayon ang " Search For Southern Star -Mandaue City Edition" niadtong Mayo 4 ngadto sa Mayo 5. Pasalamat usab sa ilang pag-abaga sa premyo alang sa mga mananaug, sa consolation prizes ug sa uban pang gikinahanglan namo.

Salamat na lang sad ngadto nilang Jonji Gonzales ug Titus Borromeo sa ilang pagtabang sa pag-coordinate og fantastic kaayo ang resulta kay miabot og 47 ka mga aspirants para mahimong l2 official contestants. Busa ubay-ubay intawon ang nangatagak, sa audition pa lang, ang nakaparat ug kini maoy salawayon, kay sa l2 nga ni-qualify unta, duha ang wala motunga, busa 10 na lang ang nahibilin, mao nga sa pagpili na sa siyam, usa na lay natagak, mao nga ang natagak, midangoyngoy. Bintaha unta to'g tolo silang matagak, kay dili kaayo sakit.

Ang pangutana, mao nga, nganong magpatugatuga og pa-audition, unya, kon mo-qualify sa first elimination, kini sila si Jerye Mathias ug Dax Echivarre, dili na man motunga, nga daghan pa raba untang gustong moapil? Anyway, mga pahalipay sa napili para sa final rounds nga sila si Reynante Buyan, Shiela Mae Sayson, ug Giovie Lynn Boschi. Silang tulo makigtigi sa ilang abilidad batok nila ni Dave Patilano, Sarah Jean Badana ug Roselle Seville [Talisay], ug sa Lapu-Lapu City nga sila si Dario Berdin, Rona Jen Lofranco ug Mariz Valmores lakip na usab sa tulo pod unyang mapili gikan sa Danao City karong Hunyo 2 ngadto sa Hunyo 3. Tuod, wa ko sa Hunyo 2 ug Hunyo 3 sa Danao City, kay isip sakop sa Batch 36 sa Oasis Of Love, usa ko sa mga facilitators sa Catholic Life In The Spirit Seminar nga ipahigayon usab sa Hunyo l ngadto na sa Hunyo 3 diha sa Echo Tech Center.

PAHABOL PASAWAY: Nakasaway sad ko niadtong gihimo kong judge sa usa ka beauty contest sa mga bata, kay ang mga ginikanan man diay ang magbuot kinsay padag-on, nganong nanguha pa man og mga judges? Kauban nako ang bag-ong napiling Miss SWU, usa ka former beauty queen nga nagtudlo na ron og psychology sa usa ka unibersidad, ug kaming tulo, polos nag-walk out, matabang nimo kana?

Sorry to say this also, pero dili ko uyon nga usa ka foreigner looking, foreigner og ngan, ug bag-o pang miabot sa Pilipinas maoy padag-on isip Miss Mandaue 2006.