Mga bata nga tiguwang

Mga batang gagmay apan kon manabi mura nag mga korek nga lupig pa ang mga batan-on. Alegre, puno sa kinabuhi ug labaw sa tanan dunay mga talento. Sila ang mga bata sa Little Big Stars nga sila si Mica Roi Torre, Makisig Morales ug Kyle Balili, kinsa kuyog sa mga teenagers nga sila si Sam Concepcion ug Charice Pempengco naghiusa sa ilang pwersa nga naghimugso sa Little Big Deeds VCD. Lahi sa ubang nanggawas nga vcd nga pambata, ang Little Big Deeds dunay pakapin nga story book, ang vcd mismo nga nagtangag sa mga kanta nga naglatay sa mga maayong pamatasan sama sa " matapat, masunurin, maparaan, matulingin ug masipag."

Sa wala pa sila motekang sa entablado sa entertainment plaza sa SM-Cebu kagahapon alang sa paglusad sa maong vcd nga gigama sa Star Records Video, nakighimamat una sila sa mga sakop sa Cebu Entertainment Press nga kasagaran nahugyaw tungod sa ilang katabian. Ug nganong dili man ka mahimuot nga kon manubag sila mura naman og mga tiguwang dako hinungdan nga dili malikayan nga magduda ka nga hayan gitudloan na silang daan sa ilang mga ginikanan? Apan ang tulo ka mga bata, Mica- otso anyos, Kyle -siete anyos ug Makisig-nuebe anyos daw nag-duet sa pag-ingon nga walay nagtudlo nila sa ilang mga tubag. Cge go!

"Sinong crush mo? Tubag ni Mica: crush po as in hinahangaan? Syempre si Ate Charice po, si ate Sarah, lahat po kasi sa mata naman Diyos lahat tayo pantay pantay eh." Feeling mo ba sikat ka na dahil lagi ka nang nakikita sa ibat ibang shows? Pong pa ni Mica " hindi ako pwedeng magsabi kong sikat na ba ako o hindi eh. Ang makapagsabi po niyan ang mga manonood eh."

Tungod lagi kay nalingaw niya ang press, gisundan na usab siya og pangutana kung unsa bay iyang gusto nga mahitabo sa iyang kaugalingon inig dako na unya niya. "Lahat po basta hindi lang masama." Dihang giingnan nga dili mahimong angkonon niya tanan, misumpay siya sa pag-ingon," ay performer at saka actor po." Karon kinsa may iyang paborito nga artista? " Si Ate Guy po, kasi magkamukha kami," diretso nga tubag ni Mica dayong katawa ug pa-cute. Suma pa niya usa ka tuig pa lang siya, mahibaw na siya nga mokanta hangtod nga nasipra niya ang "you love me, I love you" nga usa sa labing naila nga kanta nga pangbata. Lola ko po kasi, singer nuon kaya lagi niya akong tinuturuan.."

Samtang si Makisig miingon nga sa dihang kwatro anyos pa lang siya makamao na siya mo-awit sa kanta ni Martin Nievera nga "Kahit Isang Saglit." Bisan dili siya maoy midaug sa Little Division, apan gisaligan siya sa ABS-CBN og project isip bida sa pantaserye nga "Super Inggo" diin nalakip usab sila si Kyle ug Sam. Si Mica usab nalakip sa 'Bituing Walang Ningning" isip anak ni Ai-ai delas Alas ug manghod ni Sarah Geronimo.

Silang tanan mapasigarbohon nga miingon sa dayon na nga human sa interview nga ang mopalit sa ilang vcd sigurado gayud nga malingaw, makasayaw ug labaw sa tanan makakutlo og maayong pagtulun-an. Gani ang nahisgutan nga proyekto gipaluyuhan usab sa Department of Education, Bureau of Elementary Education.