Mga Batang Garbo sa Sugbo

Human sa kapin usa ka buwan nga pagpa-ambit nila sa ilang mga bulawanong mga talento didto sa Amerika, nahibalik na dinhi sa nasud ang garbo sa Mandaue- ang Mandaue City School for the Arts. Niadtong miaging semana sa pagpakighimamat nila sa Cebu Entertainment Press, kalipay ug kadaugan ang ilang gipalanog human sila abibahe sa taman sa tanan nga nakakita sa ilang mga pasundayag didto sa pipila ka bahin sa Estados Unidos pinaagi sa usa ka US Concert Tour.

Ang Mandaue City School for the Arts usa ka ispesyal nga tunghaan nga nag-inusara lang lukop nasud, sanglit tahas niini mao ang pag-ugmad sa potensyal sa mga batan-ong kabus nga naggikan sa nahisgutan nga dakbayan. Dinhi ning maong tunghaan palamboon ang abilidad sa matag istudyante aron ang ilang mga potensyal hingpit nga maumol nga talento, nga karon inanay na nga natuman.

Kini gitukod niadtong 1998 ug duna kini duha ka curriculum diin pahimug-atan ang academics inig ka buntag ug pagtudlo sa arts inig ka hapon. Apan dili sayon ang pagsulod sa maong tunghaan tungod kay kinahanglan nga ang umaabot nga estudyante dunay abilidad nga ikapasigrabo ug adunay taas nga grado. Ang regular nga estudyante nanginahanglan og 85% nga average aron makapadayon pa siya sa iyang pagtuon. Apan hugyaw usab ang ganti sa haom nga magpabilin sa tunghaan, tungod kay gawas nga mapalambo ang ilang talento makalaag pa sila sa nagkadaiyang dapit nga libre ang tanan.

Usa na niini ang US Tour kaniadtong March 31 hangtod April 23. Kauban ilang mga magtutudlo, adunay 39 ka mga tinun-an ang nakakuyog sa maong konsiyerto, 14 niini ang lakip sa dance troupe ug 25 ang miyembro sa choir nga nagpanuigon ug 10 ngadto 14 anyos. Upat ka mga lain-laing lugar sa Amerika ang ilang gipasundayagan sama sa Fort Collins ug Denver sa Colorado, Salt Lake City sa Utah ug Los Angeles sa California. Lakip sa ilang gipakita mao ang koleksyon sa lain-laing mga awit ug sayaw gikan ispiritwal, native ug western nga tema. Suma pa sa ilang trainer ug conductor nga si Dennis Gregory Sugarol nilungtad ngadto sa unom ka buwan ang pagbansaybansay sa mga bata alang sa nahisgutang concert tour.

Malipayon nga giasoy sa mga tinun-an ug magtutudlo nga sila nakadawat og mainitong suporta gikan sa mga Filipino communities lakip na usab ang mga turista nga nanan-aw sa ilang gihimong konsiyerto. Ug tungod sa kamaayo sa grupo, gihatagan og standing ovation sa tanan nilang pasundayag didto. Tungod niini, gibati og kamingaw ang mga Pinoy didto sa nagkadaiyang Filipino communities ug nagpanikad na sila nga muduaw sa Pilipinas, labaw sa tanan, mosaksi sa nagkadako na nga Mantawi festival.

Bisan pa og dugay-dugay ang ilang pagpuyo didto sa Amerika, wala sila mibati og kamingaw suma pa sa ilang artistic director nga si Jose Rodrigo Aviles. Kini tungod kay aduna man silay mga foster parents nga mga Pinoy ra usab nga labihan nga naka-abi abi nila sama sa pagsuroy suroy bisan asa na lang lakip na didto sa nabantog na kaayo nga Disneyland. Ang pagkaon nga gidalit, "pinoy delicacy" ra usab.

Suma pa ni Mandaue City Schools Division Superintendent Dr. Lorna Rances, ang tumong sa maong konsiyerto mao ang pagpaambit ug pagpasigarbo ngadto sa tibook kalibutan sa mabulukong matang sa sining ug kultura dili lang ang sa Mandaue City kon dili lakip na ang sa tibook nasud. Ug bisan pa'g adunay daghang krisis nga giatubang karon ang Pilipinas, angayan nga dili kita magpakawala sa paglaum tungod kay duna gihapon kitay ikapasigarbo nga talento nga dili masundog sa uban.

Dili kadudahan ang nahimong kalampusan sa maong tour ug malipayon kaayong nipaambit ang grupo sa ilang pagpasalamat sa tanang nitabang nga nadayon ang maong kalihokan hilabi na sa mga tawong mikuot sa ilang mga bulsa alang sa galastuhan. Ang mga bata malipayon usab nga gihatagan sila og higayon nga mapalambo ang ilang katakos sa performing arts ug sila mapasigarbohon nga nahimong mga tinun-an sa Mandaue City School for the Arts. Kini tungod kay di lang nila ikapaambit ang ilang mga talento sa kadaghanan, sila mismo natabangan aron makab-ot nila ang ilang mga pangandoy sa kinabuhi.

Dili na maihap ang nakab-ot nga kalampusan sa Mandaue City School for the Arts children's choir ug dance troupe, kini mahitungod sa lain-laing ganti ug pasidungog nga ilang nadawat dinhi sa Sugbo ug didto sa kaulohan. Niadtong Nobiyembre 27, 2004 nakadaog sila isip 1st prize winner sa National Music Competition for Young Artists, usa ka halangdong kumpetisyon sa nasud. Mahitungod niini, sila gidayeg isip "Garbo sa Sugbo" niadtong niaging December 7, 2004. Ug bag-ohay pa lang, naangkon usab nila ang PERLAS Award nga maoy labing taas nga pasidungog sa natad sa performing arts dinhi sa Sugbo. Sayo karong tuiga, nakauban nila pag-perform ang bantogan nga international performer ug original Miss Saigon nga si Lea Salonga atol sa Advertising Congress.

Tungod niini, haom lang nga sila hangopon dili lang ilang mga talento dili lang dinhi sa Sugbu kondili lukop nasud. Tiunay nga garbo natong tanan sila angay lang nga hatagan nato og standing ovation kay sila naghatag man og kadungganan sa ilang yutang natawhan ug sa rehiyon nga sila naggikan.