Usa sa mga judges sa talents night sa ako nang na-report, dili Mandauehanon, pero dunay katungod sad nga mahimong judge, kay very talented man gyod as in. Siya usa sa mga sakop sa nabantog na nga SAKDAP, nga kanhi nagtrabaho sa usa ka bangko, apan mi-resign, kay nangunay pagdumala sa iyang recording studio diha sa Esperanza Village sa Tisa, dakbayan sa Sugbo, ang SOUNDTRAXX. Kini nga kompaniya maoy gisangonan sa Cebu Arts Foundation para sa Metro Cebu Popular Music Festival. Dili na gyod kono madala sa lawas, kon magpadayon pa siyag trabaho sa bangko, kay matud niya, "I just can't serve two masters at the same time," ug mahitabo pa kono unya ang "conflict of interest." Ang akong gipasabot mao si Gani Villarojo, bana sa kanhi Miss Cebu Tourism, Gloria Ferraris Sua de Villarojo, ug karon, napiling Hermano Mayor pod sa piyesta sa Barangay Looc, lungsod sa Malabuyoc. Ug aron malahi kono rong tuiga, magpili sad sila's ilang kaugalingon version sa labing una gyod nga "Miss Looc 2006" karong Sabado May l3, didto sa Looc Basketball Court nga pagasundan usab og summer disco pagka sunod gabii. Inabagan kini sa Looc Barangay officials, SK Federation ug sa Hermanos Y Hermanas de Malabuyoc agig pasidungog ngadto sa ilang Patron, San Isidro Labrador.
Ang mga kandidata nga magtigi sa korona nga dili kono gyod mga imported kay gikan gayud mismo sa lain laing sitio sa maong barangay, gilangkuban nila ni Diane Jane Cuevas, Jade Marie dela Pena, Iris Kim de Luna, Crystal Mae Glimada, Joan Baldos, Carrel Catubig, Ronnalyn Vildosola, Cherry Lyne Diana, ug Mary Ann Santosidad. Himamata sila. May kaanyag nga mahagpat no?