Dili basta-basta ang responsibilidad nga sagubangon unya sa umaabot nga rayna sanglit ang tanan mag-atang kaniya kon matupngan o malabwan ba niya ang kalampusan ni Bb. Pilipinas World Ana Maris Igpit, kinsa kasamtangan usab nga nanag-iya sa titulo nga Miss Mandaue.
Adunay 20 ka mga kandidata, sila tanan maanyag ug dunay pagsalig sa ilang kaugalingong katakus. Apan usa lang kanila ang purongpurongan karong gabii diha sa Mandaue City Sports Complex. Kinsa kanila ang labing haom? Ania ang panagna ug pagbanabana sa Banat Hugyaw alang sa posibling maglangkub unya sa top 10 finalists.
1. Monique Carole de Leon (candidate number 14) - disisais anyos, dunay gitas-on nga 5'6 ft ug gibug-aton nga 155 pounds. Mestiza nga bag-ong sulbong sa natad sa indigay sa kaanyag.
2. Joan Kirstie Babor (candidate number 16) - disiotso anyos, tinun-an sa kurso nga nursing, dunay gitas-on nga 5'7 ug timbang nga 110 pounds. Siya ang kasamtangan nga Miss Philippines Fame ug sakop usab sa Metrobank Toastmaster's Club.
3. Isadora Maidee Gonzales (candidate number 20) - 5'9 ang gitas-on busa labing dali nga mabantayan. Lumad nga taga Poblacion Trinidad Bohol, sa pangidaron niya nga disisais, tang-an na sa mga beauty pageants.
4. Richelle Therese Borja (candidate number 19) - laing bag-o nga nawong sa natad sa indigay sa kaanyag, kaliwat og taga Toledo City diin ang iyang mga kadugo mga politiko. Disisiete anyos nga dunay gitas-on nga 5'7 ug timbang nga 55 kilograms.
5. Nicole Schimitz (candidate number 17) - 5'7 ang gitas-on sa pangidaron nga disisiete anyos. Filipina -Australian ang kaliwat ug bag-o nga sulbong usab apan nakaapil na og tulo ka pageants sulod lang sa usa ka buwan.
6. Maria Victoria Salazar (candidate number 13) - gianggaan og Tonivi, usa sa mga beterana na nga kandidata ug dunay gitas-on nga 5'6 ½ ug timbang nga 46 kilograms. Siya ang kasamtangan nga Miss Minglanilla ug Miss Toledo City ug 1st runner-up ni Igpit sa Miss Bohol Sandugo 2005.
7. Sheina Marie Cubillo (candidate number 4) - 5'5, ang gitas-on, laing kandidata nga beterana na usab. Hawod manabi ug posibling maoy modaog isip 'Darling of the Press".
8. Kathy Lyn Atuel (candidate number 11) - dunay gitas-on nga 5'6, ikaduha na niya nga apil sa Miss Mandaue diin sa nakalabay nga tuig nasulod siya sa top 10 apan nakulbaan pag-abot sa Q& A portion.
9. Princess Stephanie Lalwani (candidate number 1) - laing bag-o nga nawong sa natad sa indigay sa kaanyag. Nangangkon nga 5'7 ang gitas-on apan posibling mas mubo pa siya kay niana. Guapa, kansang nawong magpahinumdom nimo sa kaanyag ni kanhi Miss Universe Sushmita Sen.
10. Phoebecates Perez (candidate number 3) - bag-o lang nakoronahan isip Miss South Pacific, dunay gitas-on nga 5'4 ug dunay tinaguang abilidad sa pagsayaw ilabi na ang dance sport.