Pagmahay, pasalamat ug uban pa

Dako gyod ang akong pagpasalamat niadtong miaging Biyernes sa buntag, Abril 28, nga human ko mobayad sa akong bill sa suga, misalikyat ko's Krua Thai kay nangita ko's venue sa Kapamilya Media Forum [pero bout unta ipasabot nga lunod patay na gyod kong KAPAMILYA ugaling lang kay mas gimahal ko sa mga kapamilya, dili ba, Lalaine Go? Tubag]. Pero sa wa pa nako matoltoli ang venue, nagkita mi ni Sir David Boy Odilao nga duna sad diay gitambongang CONFAB alang sa mga MASON. Bisa'g duna siya' gika-istorya niadtong panahona, mitindog gyod siya aron ipaila ang iyang mga kauban. Gidapit ko nila sa paglingkod uban nila, apan kay dili man maoy tuyo nako nga makigkulukadidang niadtong higayona, nangayo kog pasaylo nga dili lang ko makig-uban nila. Gawas pa, ordinaryong "Kapamilya" T- shirt ang akong gisul-ob samtang sila todo barong tagalog.

Apan sa wala pa ko hingpit nga nanamilit sa grupo midalikyat gyod Sir David "Boy" Odilao pag-ingon nga husto si Leo Lastimosa sa pag-ingon nga, angayan untang ang "Kadaugan sa Mactan" maoy numero uno nga garbo sa mga Pilipino, kay dinhi man gikapakita ang kaisog sa mga Pilipino. Apan daw kuwang kini sa media coverage ug daw wa mahatagi og mas nindot nga pagtagad sa kagamhanan.

Midugang si Odilao sa pag-ingon nga, daw nagmahay na siya karon sa kagamhanan sa Lapu-Lapu City kay wa na gani siya dapita sa maong kasaulogan nga unta, siya may nagpasiugda niini kaniadto pinaagi sa "Bahug Bahug sa Mactan," pila na ka tuig ang nakalabay. Midugang siya nga bisan pa og giilisan ang ngalan niini, ngadto sa "Kadaugan sa Mactan," dili ikalimod nga siya gyo'y nagmugna sa maong kalihokan. Niadtong mga panahona nakita niya ang kamakahuloganon niini, sama sa pagmugna usab niya sa "Sinulog."

* * *

Anyway bisan pa sa mga pagmahay ni Sir David "Boy" Odilao, magpasalamat lang gihapon ko sa mga taga Lapu-Lapu City labi na sa mga taga City Tourism, Cultural and Historical Affairs ug sa mga taga Social Welfare Administration sa ilang pag-abi-abi namo. Kauban nako sila si Bro. Novo Bono, Bro. Ven, Bro. Jay Jabonero, Sister Stella Palomo M. ug uban pa, alang sa among Lapu-Lapu City Edition sa "Search For The Southern Star" niadtong Abril 24 ug Abril 25. Mga pasalamat among itunol ngadto kanila ni Hon. Damian Gomez [chairman-Lapu-Lapu City Tourism, Cultural and Historical Affairs], Hon. Paz Radaza [co-chair], Rudy Villanobos, Hon. Arley B. Berdin, Hon. Cecilia Malingin, Hon. Rodulfo Potot, Hon. Eduardo Cuizon, Atty. Alfonso Alerre, Mr. Manny de los Santos Rabacal, Mr. Ernesto Francisco, Mr. Timothy Wright, Mr. Romeo Beronda, Mrs. Ida Rago, ug Mrs. Donatila Amores. Lakip na usab ang mga sakop sa staff nga sila si Elmer Potot, Sunshine Alegre, Wendilyn Ignacio, Sheila Lumungsod, Anet Booc ug Joan Tenebroso.

Samtang itunol namo ang among pahalipay sa napiling tolo ka mananaog sa Lapu-Lapu City Edition nga sila si Dario Dico Berdin, Rona Jen Lofranco ug Mariz Valmores. Kini silang tolo maoy makigharong sa mga kampyon sa uban pang mga syudad sa lalawigan sa Sugbo sa grand championship unya sa Disyembre. Mahinumduman nga ang tolo ka mananaog sa Talisay City edition mao sila si Dave Patilano, Sarah Jean Badana ug Roselle Seville, usa ka lalaki ug duha ka babaye. Ang sunod nga edition mao ang Mandaue City edition. Masaksihan ang maong bangga sa awit matag alas 8:00 sa gabii sa Domingo, sa CCTN- Channel 47.