Pagsubang sa bag-ong bitoon

Human sa hataas nga higayon nga ilang gipakita ang ilang katakos ug talento, hingpit na nga moabot ang gabii sa paghukom. Kini ang gabii sa tanang mga gabii, sanglit atol unya niini lain na usab nga bitoon ang mosubang aron mokulit og pangan sa mga panganod sa kalibutan sa musika. Kini ang tigi nga maoy mohatag og katumanan sa mga damgo ug pangindahay. Kini ang grand showdown sa Pinoy Pop Superstar batch two nga mahitabo na sunod semana sa GMA-7.

Ang maong panagtigi salmutan sa pito ka mga grand finalists nga sila si Gerald Santos, Harry Santos, Aicelle Santos, Irra Cenina, Rosemarrie Tan, Denver Regencia ug Elise Estrada.

Si Gerald Santos, 15-anyos nga taga Navotas, mao ang kinabataan sa mga finalists. Apan bisan pa man niana, wa siya magpalupig diin iya gayud nga gibubo ang iyang igong katakos sa iyang pagkanta. Siya nahimong second grand contender sa Pinoy Pop Superstar human siya naghari sulod sa unom ka semana.

Nagsugod si Gerald sa pagsalmot sa mga singing contests sa edad nga 10 anyos sa nagkadaiyang mga barangay diin siya kanunay nga makaangkon sa unang ganti. Matud pa ni Gerald, ang iyang kinaham mao ang mga karaan nga ballads.

Samtang mahinumdoman ninyo si Josh Groban kung kamo makapamati sa tingog ni Harry Santos, ang first grand finalist sa Pinoy Pop Superstar. Si Harry nahimong seven week champion sa PPS 2.

Ang laing finalist nga si Aicelle Santos nakaapil og susamang contest sa laing estasyon diin usa siya sa mga finalists. Si Aicelle mao ang unang female grand contender nga nimugna og kasaysayan sa Pinoy Pop sa dihang nahimo siyang weekly champion sulod sa walo ka semana ug wala gayu'y nakapildi kaniya.

Sa laing bahin, si Irra Cenina mao ang giingong labing charming ug labing komportable kung pag-atubang sa mga sakop sa press maoy hisgutan, sama na lang niadtong nibisita sila sa Sugbu sa nakalabay nga buwan. Si Irra nga maayo sa mga kanta nga RnB, slow jazz ug ballad nagplano nga mokuha og law human sa bangga sanglit damgo gayud niya nga mamahimong abogado. Siya niingon nga gusto gayud niya nga makatabang sa iyang pamilya mao nga himoon gayud niya ang tanan aron makadaog sa contest.

Samtang ang 18 anyos nga si Rosemarie maoy pambato sa Estados Unidos. Siya nakasalmot usab sa usa ka musical didto sa New York, ingon man sa uban pang mga singing contest sa gawas sa nasud. Siya nagplano nga magpabilin sa Pilipinas kung siya mapiling grand champion.

Ang pagka determinado ni Denver Regencia maoy nahimong yawi nganong siya nagmalampuson. Kini tungod kay bisan og wala siya makasulod sa Manila ug Cavite nga auditions sa Pinoy Pop, wala gayud siya mawad-I sa paglaum ug nanimpad gihapon siya sa audition didto sa Davao nga maoy iyang yutang natawhan. Si Denver miingon nga gusto gayud niya nga mamahimong sikat nga mang-aawit hinungdan nga dili gayud siya mohunong hangtud nga matuman niya ang maong pangandoy.

Si Elise, sa laing bahin mao ang "sexy singer" sa grupo. Ang 18- anyos nga dalaga nga nagtubo didto sa Canada diin tua na karon ang iyang pamilya , dunay tingog nga susama sa kang Carole King hinungdan nga ang iyang version sa kanta sa naulahi nga "Natural Woman" maoy gihimong flagship song sa Pinoy Pop Superstar grand contenders album.

Dungan niini, gipadayag sa grupo nga mapasalamaton gayud sila sa exposure nga ilang nadawat pinaagi sa PPS2 apan ila usab nga giangkon nga duna nay mga gimbuhaton nga dili na nila mahimo tungod sa pagka busy sa ilang schedule. Gani, mihunong una sila sa ilang pagtuon aron mapunting ang ilang tibuok atensyon ngadto sa indigay.Dili na usab susama kaniadto nga makagahin sila og oras sa ilang pamilya. Dili na usab sila makaadto sa mga malls tungod kay basin mawala ang ilang appeal sa publiko kung makit-an sila pirme. Si Aicelle miingon nga dili na usab sila mahimong mosul-ob og mga simple outfits kay kinahanglan nga presentable sila nga tan-awon kanunay.

Pwes unsa ang kalainan sa Pinoy Pop Superstar sa ubang mga singing contests? Tanan sila niingon nga sila gipailalum gayud sa labihan nga pagbansaybansay, workshops, rehearsals ug personality development programs.

Nan kinsa ang mamahimong sunod nga singing sensation? Mahibaw-an kana ninyo karong Sabado sa gabii pinaagi sa Kapuso network. Atangi!