Guapahay ug guapohay ang initial nga bangga sanglit tanan dunay mga dagway nga sarang ikapasigarbo. Sigurado na usab nga utokay ang umaabot nga indigay sa pagligid sa mga adlaw sanglit dunay valedictorian, dunay ROTC officer ug dunay debater nga nasulod. Ang uban nagpanikad nga pamatud-an sa ilang kaugalingon nga sila dunay igong katakus paglangkat sa titulo isip labing una nga PBB Teen Big Winner sa nasud. Busa karon pa lang nag-iyahay na og pangita ang mga tumatan-aw og manok nga maoy ilang paluyohan. Apan duha lang ang sigurado- kulbahinam ug dili sayon ang dalan nga subayon sa umaabot nga big winner.
Nag-una sa listahan mao ang 'Amboy" nga si Gerard, basketball player ug gikagubtan sa mga kababayn-an gumikan sa iyang kaambongan. Gani gipanghambog man niya nga dihay higayon nga bayran unta og P2000 ang iyang cellphone number aron siya mamahimong textmate. Ikaduha mao si Nina, Sosy Girl nga taga Makati, maanyag ug dunay barog nga pang -beauty queen. Siya tinun-an sa Assumption College nga nagdumili pagsalmot sa usa ka beauty pageant sanglit buot siya nga sa 'Bahay ni Kuya" mobakasyon.
Ikatulo nga housemate mao si Mikee, utokan ug sakop sa nabantog na nga Ateneo University Debating Team. Nagsunod niya ang atong pambato nga si Kim, Chinese Cutie nga matud pa niya, daghan ang miingon niya nga dili siya masulod apan iyang napamatud-an nga sayop ang mga tawo nga wala mosalig sa iyang katakus. Ikalima nga housemate mao si Bam, Boyish nga komedyante gikan sa Paranaque. Ika-unom mao si Olyn, teenstar wannabe gikan sa Quezon City kinsa bugtong anak babaye sa pamilya hinungdan nga kanunay gibantayan sa iyang mga igsuon nga lalake. Ikapito nga housemate mao si Fred, perfectionist hunk nga taga Paranaque. Bisan pa man sa iyang kaguapo, mauwaw siya nga manguyab.
Si Clare nga taga Bukidnon mao ang ika-walo nga housemate, kanunay nga moapil sa mga indigay sa kaanyag apan permanenteng gibiay-biay nga bati siyag nawong. Damgo niya nga mamahimong artista. Ika-siyam nga housemate mao si Aldred, Valedictorian nga taga Pasay. Siya andam nga magkalisod ug manarbaho aron lang masuportahan ang iyang pagtungha. Si Mikki, taga Davao maoy ika napulo nga housemate. Sa sinugdan hinhin siya nga manlihok apan human sila biyai sa ilang amahan two years ago, nakat-on siya pakigbatok sa bisan unsang hitabo nga makadaot niya. Ang ika onse mao si Matt, happy-go-lucky bisan pa man og gibiyaan sila sa iyang amahan hinungdan nga miundang siya pagtungha aron suportahan ang iyang pamilya. Ang katapusan nga housemate mao si Jamilla, half-Puerto Rican nga taga Laguna kinsa sa pangidaron nga disisyete, napaangkan busa mitrabaho sa bikini bar aron sila mabuhi.
Silang tanan ang umaabot nga mga bag-ong rayna ug hari sa wanang nga entablado sa arte, kinsa andam buhaton ang tanan aron lang malangkat ang gipangandoy nga korona.