Hugyaw ang pagduaw

Wa gyud kapugngi ang paghapit nako uban sa akong mga kauban sa among shooting didto sa Fort San Pedro ug Plaza Independencia sa tindahan sa magtiayong Mr. and Mrs. Caparida kay namatikdan man namo nga nauli na diay ang magtiayon gikan sa ilang bakasyon sa Hong Kong diin mibisita sila sulod sa kapin sa usa ka buwan didto, diin tua na karon ang ilang ultimate entertainer nga anak mag-entertain sa nagkalain-laing mga langyaw sa mga dagkung hotel. Ang anak mao si Rio Caparida, ang kanhi leader sa ilado na kaayong mga bata nga singer nga gitawag og Anak-Sugbo. Nahimo usab nga mainstay sa "Sabado Na Gyud" ug napiling usa sa Cebu's Five Prettiest nga lima na ka tuig ang nakalabay, pila ka buwan sa wala pa siya molarga paingon sa Hong Kong isip usa ka singer sa banda. Apan karon usa na ka in demand nga entertainer sa mga nagkalin-laing mga hotel didto lakip na ang Waterfront Hotels.

Misamot ang ka hugyaw sa biyahi sa magtiayon kay sa maong pagbisita nila, gisurprisa man sila sa ilang hugyaw nga anak pinaagi sa pagpaila niya sa iyang current boyfriend, si John Robert Mercado, kinsa maoy midala kanila og suroy sa mga nagkalain-laing dapit sa Hong Kong labi na sa Disneyland. Niining hulagway, makita ang magtiayong Caparida ug anak, Rio uban sa iyang boyfriend, John Robert Mercado.

Ang gikauban diay tuod nako sa shooting niadtong adlawa, Miyerkules sa hapon, Abril 19, niining bulana mao ang among production manager, Tess Diez, direk Pips Tariman, cameraman June Gino Philip Tar (nga artista usab), Ruby Ramirez (nga kauban usab namo dinhi sa The Freeman ug Banat News, Roderick Bontilao, Jopay Laguna, Jun Dee Galaxy, crew ug artista pa gyud nga si Mario Aguilar (kanhi macho dancer kuno ni siya ug miapil pud sa gitawag og escort services nga mo-escort og mga turista, busa may kaambong nga mahagpat ug naibgan ni Jopay Laguna) ug ang tulo ka unanong giila na karon nga Tres Metros sa kabataan, sila si Ramil, George ug Marlon.