Hugyaw ni Budoy ug kaubanan

Human maghuygaw ang tibook nasud kon dili man ang tibook kalibutan subli na usab nga mi-arangkada ang "M16 ng Samar" apan ning higayona dili na sa sulod sa 'Bahay ni Kuya" kondili sa natad sa musika.Kauban ang iyang mga ka-banda sa grupong Junior Kilat, si Budoy subli na usab nga mopaambit sa iyang talento karong adlawa.

Pwes, dali ug maghugop kitang tanan adto sa SM Entertainment Plaza karong alas kwatro sa hapon aron saksihan ang paglusad sa Junior Kilat sa ilang labing bag-o nga album, nga giulohan og "Buwad Suka Sili", nga gigama ubos gihapon sa Galaxy Records.

Ang kanta nga "Buwad Suka Sili" naghisgot sa nagkadaiyang mga sikat nga pagkaon diin gihagit ni Budoy ang usa ka babaye pagtagna unsay iyang paborito dungan ang pagkomedya nga dili makahalok niya ang babaye kon dili niini matagnaan ang hustong tubag.

Laing kanta nga nalakip sa maong album mao ang "Lubot sa Yawa," nga naglakbit sa mga pamaagi sa yawa pagtintal sa katawhan diin ang maong awit nagpasidaan sa tanan sa dili pagpailad sa mga maanyag ug mahalon nga mga butang gumikan kay ang yawa maayong mangita og paagi aron mahaylo kitang tanan.

Nagtangag usab ang maong album, music video sa nabantog na kaayo nga "Ako si M16" nga kanta, diin gipakita usab kon giunsa kini paghimo. Pwes, ayaw pagpa-alkanse, adto na pakighugyaw sa Junior Kilat sa SM Entertainment Plaza karong hapon. PR