Sandara 'kilig' gihapon kang Joseph

Gitug-an ni Sandara Park kagahapon sa hapon nga bisan og tinood sila nga nagkahigugmaay ni Joseph Bitangcol, duna gihapo'y "kilig factor" nga makita sa ilang pelikula nga D' Lucky Ones, ang latest offering sa Star Cinema.

Si Sandara dinhi sa Sugbu kagahapon kauban ang pipila ka casts sa naasoy nga pelikula sama kanila ni Nikki Valdez, Carla Humpries, Janus del Prado ug Joseph.

"Yes may kilig pa rin like sa rehearsals may mga ginagawa kami na wala sa script tapos nakita ni direk Wenn Deramas kaya sabi niya gawin ninyo. Nakakakilig talaga. Ako nga nakikilig pa rin kay Joseph," asoy ni Sandara atol sa presscon kagahapon nga gipasiugdahan sa JSP Ads and Promotions didto sa Krua Thai sa SM City.

Apan wala malikayi ni Sandara ang pag-angkon sa tinood niyang gibati diin miingon siya nga samtang gigama pa nila ang pelikula, nakuyawan siya kon dawaton ba sa publiko ang ilang team-up ni Joseph sanglit mas naila man siya kaniadto uban kang Hero Angeles.

"Natatakot ako eh kasi pag-sinabing Hero kasama talaga ang Sandara eh. As grabe talaga ang chuva ko kay Hero noon. Pero nong nag-show na kami sa Manila maganda naman ang pagtanggap ng mga tao sa amin ni Joseph kaya sana magustuhan nila talaga."

Subling gipamahayag ni Sandara nga dili for publicity lang ang relasyon nila ni Joseph tungod kay tinood gyud nga uyab sila, gawas pa matud pa niya nga kon binuang lang wala untay mga isyu kaniadto tali nilang duha sa dihang si Hero pa ang iyang loveteam.

Matud niya nga pareha silang duha ni Hero nga walay espesyal nga pagbati alang sa usag-usa kaniadto ug ang tanan nga 'pacute" gihimo nila aron mohumot ang ilang loveteam.

Miingon si Sandara nga karon nga gihatagan pa siya og second chance sa Star Cinema bisan og kalit siya nga mibiya sa nasud kaniadto sa dihang nagsugod siya og ka-inila, dili na gyud siya magnilabad.

"Dito na talaga ako, babalik na lang ako don siguro pag nag-asawa na ako," pong pa niya dayong pahiyom.

Sa samang higayon, hugtanon nga gipanghimakak ni Joseph ang taho nga miburot na karon ang iyang ulo sanglit ang mga proyekto nga alang unta kang Hero siya na maoy nakaangkon.

"Hindi po totoo yon. Nalulungkot po kami sa nangyari sa kanya (Hero) pero wala tayong magagawa. Sa akin trabaho lang talaga at saka may pangarap din po ako para sa career," pasabot ni Joseph.

Samtang gipasalig ni Sandara nga sigurado gayud nga malingaw ang mga motan-aw sa iyang labing bag-o nga pelikula sanglit kompleto na kini, dunay drama, comedy action ug adventure.

Sa laing bahin, gipadayag ni Nikki nga sa dihang gigama nila ang nahisgutang pelikula sama ra sila og nagduwa tungod kay walay pressure ug nalingaw kaayo sila sa ilang mga eksena.

Ang D Lucky One's moabli sa mga sinehan lukop nasud karong Abril 15 diin apil usab sila si Pokwang, Eugene Dominggo, Candy Pangilinin, JR Valentin ug Franzen Fajardo.