Perte gyung Hugyawa!

Buak nga bildo ipaniudto ug ining kahuman manglimugmog og kayo. Mahimo usab nga imo siyang targeton ginamit ang mahait nga dart. Ug bisan pa man niining tanan, ayaw kabalaka kay dili siya mobatyag og sakit ning atong bida. Mao bitaw nga gitawag ni siya og Amazing Virga.

Si Virga nga personal nga mibisita sa Banat Hugyaw niadtong Miyerkules sa hapon, mitug-an nga naanad na siya sa iyang trabaho. Ug tungod sa kadugay na niya sa maong propesyon nasinati na kaayo ang sikreto aron dili na siya makabatyag og sakit. "Manhid na ako," paghulagway ni Virga sa iyang buko-buko nga kapila na gitaroyan og dart.

Gani matag human sa iyang show modiretso siya sa dressing room nga walay kalibutan nga nag-taup pa ang dart sa iyang likod. Tukmang choreography, practice, ug tiunay nga pag-amping sa iyang matag lihok-kining tanan maoy sekreto nga hangtud karon padayun pa gihapong mahugyaw sa iyang abilidad ang tanan nga motan-aw kaniya.

Si Virga nga usa ka bayot mitug-an nga sa dihang nagtubo pa lang siya didto sa iyang yutang natawhan sa Tandag, Tago, Surigao del Sur, nasayod na siya nga duna siya'y talagsaon nga talento. Busa iya kining gibaid hinungdan nga pagligid sa mga katuigan napadpad na siya sa nagkadaiyang mga nasud ug giistoryahan ug gidayeg sa nagkadaiyang mantalaan ug magazines gumikan sa iyang talagsaon nga abilidad.

Nagsugod ang iyang kasikat niadtong tuig 1996 sa dihang gidapit siya aron mopasundayag didto sa Saipan. Sukad niini wala nay puas ang iyang mga imbestasyon. Karon sa pangidaron nga 38-anyos mag-ngadto-nganhi na lang siya sa Japan. Kini tungod kay mas gipili ni Virga nga ipunting una ang iyang atensyon sa iyang gipatukod nga balay didto sa iyang probinsya sa Surigao.

Sayod si Virga nga delikado ang mao niyang trabaho apan matud pa niya, "happy" siya gumikan kay pinaagi niini nasupurtahan man niya ang iyang pamilya. Gani nakapalit na siya og umahan nga sarang kapanginabuhian sa iyang katagi-pamilya didto sa Mindanao. Ikapanghambug usab ni Virga nga nakatabang pud siya sa iyang mga amigang mga mahuyang pinaagi sa pagpatukod og beauty parlor didto sa kaulohan.

Talagsaon ra ang kahigayonan aron hingpit ninyo nga masabtan unsa gayud nga hugyaw ang abilidad ni Amazing Virga. Pwes pahimusli ang higayon nga inyo siyang makita sa linawas nga pasundayag karong gabii (Sabado April 8) diha sa Club Mermaid sa Lapu-Lapu City. Mobalik ra usab hinoon siya diha sa nahisgutang club, human sa iyang pasundayag didto sa Butuan sunod buwan.

Alang sa interesado tawga ang iyang manager nga si June Mantilla sa cellphone number 0921-6371008.