Criselda, naghilas-hilas, nagnilabad

Nagpasaway ang sexy starlet nga si Criselda Volks pinaagi sa pagsukmat ngadto sa beteranang talk-show host nga si Cristy Fermin nganong nakigkuyog sila kanila ni Chris Villanueva ug Zhar Carbonel nga manginom og kape didto sa usa ka hotel.

Sa nasayran tulo na ka semana nga nagputak-putak si Criselda batok kang Cris nga kanhi ka-relasyon sa naulahi ug batok usab kang Zhar nga maoy gikapuyo karon ni Cris.

Ang away nagsugod sa dihang giakusahan ni Criselda si Cris nga walay hatag-hatag og sustento ngadto sa ilang anak nga si Rafa hangtud nga midako ang gubot sa dihang matud pa bisan unsa na lang nga mga negatibong pulong ang gibuhian ni Criselda ngadto kang Cris ug kang Zhar sa higayon nga magpa-interview ang nahisgutan sa nagkadaiyang talk shows.

Hinungdan nga ning bag-o lang gidapit nila ni Cris ug Zhar ang mga kolumnistang sila si Christy Fermin, Jobert Sucaldito ug Richard Pinlac aron ipadayag usab ang ilang habig.

Nasayran pinaagi sa PangMasa nga gikasakit diay ni Criselda ang maong panagtagbo ug wala makapugong gisukmatan niini si Christy pinaagi sa text message. '

'I heard you had coffee with Cris and Zhar, bakit kayo ganun, I hope you'll practice fairness,''yawyaw ni Criselda nga gitubag usab ni Christy nga walay nanag-iya nila ug si bisan kinsa nga modapit nila ilang kuyogan basta duna lang silay panahon.

Apan mihirit ang beauty ni Criselda pinaagi sa text message gihapon nga ''I've decided to erase your number in my phone now. Rest assured I will never call or text you again. Thank you."

Gitubag ni Christy pinaagi sa pag-ingon nga "ma at pa" nga buot pasabot "malay ko at pakialam ko" busa wala magdugay mibawos ang Criselda ug lain na ang tonada sa mensahe niini. ''I was so sorry kanina, I was just too emotional, I am really sorry, I hope you can forgive me. Your number is in my unit again,'' hirit ni Criselda.

Wala na nila panumbalinga ni Christy si Criselda tungod kay matud pa sa beteranang TV host sa tinood lang gisamokan na sila sa nahisgotan nga starlet tungod kay bisan og kadlawon nga dako magpada gihapon og mensahe kon dili manawag gyud, nga alang niya dakong distorbo.

* * *

Mopahuway una ang tabian nga host sa Unang Hirit sa GMA-7 ug Liga ng Kababaihan sa QTV27 nga si Suzi Entrata Abrera aron atimanon ang bag-o niyang anak ug aron usab makabaton siya og panahon nga magpa-sexy.

Gihimugso ni Suzi ang ilang ikatulo nga anak ni Paolo Abrera didto sa Capitol Medical Center niadtong Lunes sa hapon.

Ang baby girl nga dunay gibug-aton nga 5.15 lbs ug dunay gitas-on nga 50 cm. Matud sa magtiayon hunahunaon una nila kon pun-an pa ba nila ang ilang mga anak aron makabaton sila og lalake.