Pagpili sa Reyna sa Kinaiyahan

Gibatikos og mga pangutana sa mga sakop sa entertainment press ang 11 ka mga maanyag nga kandidata sa Miss Philippines-Earth Central Visayas 2006 atol sa gipahigayong press conference niadtong Sabado sa hapon diha sa Holiday Spa sa Banilad niining dakbayan.

Sa maong kandidata mulugwa ang representante sa rehiyon alang sa nasudnong indigay karong umaabot nga Mayo didto sa kauluhan.

Ang mga napili aron magtige sa rehiyonal nga korona karong Abril disisyete diha sa Atlantic Hall sa Waterfront Lahug mao sila si Angry Marie Tandoc, Aiza Alcantara, April Grace Tiodiano, Dyza Jagna, Ghea Mae Dalagdag, Jam Charish Libatog, Jill Fritzie Lastimosa,Jody Michelle Yu, Liv Alegado, Maria Clarissa Galang ug Saxony Abarquez.

Sanglit ang makadaug sa korona magbaton man og responsibilidad pag-amoma sa kalikupan ang mga pangutana gisentro sa pag-panalipod ug pag-ugmad sa kinaiyahan.

Kasagaran sa tubag sa mga kandidata sa dihang gipangutana unsa ang mga suliran nga giatubang karon sa kinaiyahan nga angay batukan mao ang air pollution, forest destruction ug water pollution.

Nunot niini si The Freeman Entertainment Editor Nathalie Tomada mihagit sa mga kandidata paggama og sumbanan nga mga pulong aron pagdasig sa kinabag-an pagpanalipod sa kinaiyahan. Busa ang unang mibuhi sa mga pulong "planting a tree and make it grow," nga matud pa nila kung magtanom ka og mga kahoy inig tubo niini mamunga ug ang bunga mapahimuslan sa tanan gawas nga ang kahoy mismo mopugong sa baha.

Ang ikaduhang grupo mibatbat sa "be a beauty of nature" isip ilang pulong sumbanan nga ang pasabot nila mao nga ang mga kandidata sa nahisgutang beauty contest maoy modelo sa pag-amoma sa kinaiyahan. Samtang ang ikatulong grupo namulong nga "preserving the environment save the life" buot pasabot nga panalipdan ug amomahon ang kinaiyahan aron maluwas ang katawhan.

Ang maong press conference pasiuna pa lang diin ang unang salgada sa mga kandidata makita ugma sa gabii diha sa Teatro sa Casino Espanol sa Lahug isip talent's night ug fashion show.

Ang tigi sa maong korona dinhi sa rehiyon karong tuiga giduma sa A.D Models Philippines sa sikat nga designer nga si Dexter Alazas.