Bianca ug Zanjoe wa ka pugong, naghawkanay

Nagkadaiya ang mga reaksyon sa giingong kissing scene nila ni Bianca ug Zanjoe sa sulod sa Bahay ni Kuya nga matud pa sa 24/7 ra gisalida ug wala ipakita sa primetime slot sa Pinoy Big Brother sa ABS-CBN.

Dunay mga nakasabot kang Bianca apan base sa tsika sa PangMasa naglabi ang mga pagsaway nga gibato ngadto sa dalaga tungod nahug nga two timer ang nahisgutan sanglit dayag pa man sa publiko nga uyab pa sila ni direktor Lino Cayetano.

Matud pa sa mga nilaban sa direktor, unta to nagbaton si Bianca og kaisog nga humanon una ang ilang relasyon sa nahauna sanglit sa sitwasyon karon sama nga giduhigan ni Bianca og lapok ang ulo sa guapo nga direktor.

Samtang duna usay milaban kang Bianca sa katarungan nga mingaw ug laay kaayo sa sulod sa "Bahay ni Kuya" busa posibli nga natintal lang ang dalaga.

Apan ang mga himantayong press people kasagaran wala makauyon sa maong esena nga nakighawok si Bianca kang Zanjoe tungod kay mahog nga simbolo kini unsa ka huyang ang dalaga.

Suma pa nila nga unsaon na lang kon pananglit pinakaslan si Bianca unya tua sa gawas sa nasud nanginabuhi ang iyang bana, magluib ba diay siya tungod lang kay nagkalagyo sila?

Dunay mitawag kang Bianca nga two timer tungod kay kapin sa usa ka buwan pa lang sila nga nagkalagyo ni Lino apan natintal ug tua na siya nagpauraray sa mga bukton ni Zanjoe.

* * *

Unsa katinuod ang taho nga nagpanikad na si Rustom Padilla nga magbaton og hinigugma apan nagpanghadlok kini tungod kay supak sa iyang tinoohan ang makigrelasyon sa sama kaniya nga lalake?

Ang tsika ni kolumnistang Lolit Solis sa PangMasa mao nga ang maong taho giingong gitug-an ni Rustom ngadto sa usa ka higala diin namahayag ang nahisgutan nga dili mahimo nga basta basta siya nga mahigugma tungod kay supak kini sa mata sa publiko ilabi na sa Diyos.

Suma pa nga ang maong kagustuhan ni Rustom mao karon ang naghasol kaniya apan ang kolumnista nga si Manay Lolit mihirit nga alang niya dili kini angayan nga problemahon sa kanhi PBB housemate.

Gipasabot sa nahisgutan nga kolumnista nga angayan nga panaminan ni Rustom ang kinabuhi sa mga madre ug pari nga gihimong inspirasyon ang ilang tawag nga mahimong mga sulogoon sa Ginoo.

Pwes wala kini magpa-sabot nga mag-pari si Rustom, suma pa ni Lolit nga dili lang ang pagbaton og hinigugma o ang paghigugma mismo maoy paagi aron mahuptan ang tiunay nga kalipay.

* * *

Angayan nga hatagan sa GMA Network si Starstruck3 Avenger Chuck Allie nga mo-host og usa ka show sanglit duna kini potensyal suma pa sa mga nakakita nilang duha ni Iwa Moto nga nanginterview sa mga Korean stars nga miduaw sa nasud niadtong Biyernes.

Suma pa nga dihang gihinabi ni Chuck ang mga artista sa Jewel in the Palace nga sila si Lady Han (Yang Mi-Kyung) ug Little Jang Geum (Cho Jeong-Eun), wala na magsalig sa cue cards si Chuck tungod kay nasag-o na niya ang iyang angay ipangutana.

Gawas pa matud nila nga nindot paminawon ang tingog ni Chuck sa higayon nga musulti na siya gawas nga mapahiyomon siya busa wala kapugngi sa uban ang pagkomentaryo nga angayan gyud unta nga siya maoy nalakip sa Final Four inay si Gian Carlos.