Balitang Starstruck - Alfred Vargas nanguyab ni LJ

Kinsa kanila ni Marky Cielo, Jackie Rice, Iwa Moto ug Gian Carlos ang mamahimong "StarStruck: The Nationwide Invasion" Ultimate Winners?

Karong gabii na mahibaw-an ang tubag sa maong pangutana atol sa "Final Judgement" didto sa Marikina Sports Park, Marikina City.

Mahibaw-an na usab kinsa sa duha unya ka mga ultimate survivors ang mapili nga Sole Ultimate Winner? Ang mga miyembro sa Council nga gilangkuban nila ni Lorna Tolentino, direk Louie Ignacio ug Joey de Leon maoy magbuot niini.

Samtang sama sa nasayran na duna nay nagpaabot nga project alang sa Final Four ug Avengers sa Starstruck batch three diin ato nang gikataho nga sila maoy molangkub sa episode nga 'Young at Heart' sa Season 10 sa 'Love to Love" sa GMA-7 sa direksyon ni Dominic Zapanta.

Karong hapon na ang final episodes sa season 9 nga mao ang "Miss-Match" nila ni Jennylyn Mercado ug Jake Cuenca, ug ang "Like Mother, Like Daughters" nila ni Isabel Oli ug Alfred Vargas.

Apan nasayran nga sa March 26 pa magsugod ang season 10 sanglit gikinahanglan pa nga humanon sa Starstruck batch three ang reality artista search una sila mahimong maapil sa usa ka regular show busa primer lang una ang ipakita karong hapon.

* * *

Dunay nasagap nga balita ang PangMasa nga usa sa Avengers sa "SS 3" nga si Vivo Ouano maoy modala sa papel sa anak ni Ybrahim (Dingdong Dantes) sa "Encantadia, Pag-ibig Hanggang Wakas" ug gani nagsugod na ang taping niini.

Apan ang Executive Producer sa Encantadia nga nahinabi usab sa PangMasa namahayag nga wala pa sila magpili og mga mamahimong anak nga lalake ug babaye ni Ybrahim tungod kay ila pang gipaabot ang resulta sa Final Judgement karong gabii.

* * *

Buwag na diay si "SS 2" avenger Megan Young ug Gian Carlos tungod kay matud pa sa nahauna ang career sa naulahi maoy gipili niini.

Gitin-aw ni Megan nga last December 21, 2005 pa sila mag-sweetheart, pero karon friends na lamang sila ni Gian.

Matud ni Megan nga girespeto niya ang desisyon ni Gian sanglit bag-o pa lang nagsugod pag-artista si Gian busa angayan lang nga hatagan og igong pagtagad ang iyang career.

Samtang gipanghimakak ni Megan nga ang iyang uyab karon mao na si "PBB" housemate JB Magsaysay tungod kay matud pa niya bisan og sa Distance Learning Center siya sa ABS-CBN nagtungha wala gayud sila magkakita ni JB ug gawas pa wala siya makaila sa nauwahi.

Mo-graduate na siya sa high school karong April 7, 2006 ug plano niya nga mokuha og kurso nga Communication Arts.

* * *

Si LJ Reyes karon ang gikataho nga gipanguyaban ni Alfred Vargas gani gikuha pa sa naulahi ang nahisgutan nga avenger sa taping niini sa SOP Gigsters niadtong Domingo apan wala sila mag-abot.

Wala pa hinooy pamahayag ang masig habig sa maong taho apan nakasiguro ang mga himantayon sa kauluhan nga maghimakak gyud sila niini.

Samtang nasigpatan ning bag-o lang sila si Mike Tan ug Iwa Moto nga nag-uban pagpangaon hinungdan nga gipangutana sila sa PangMasa kon sila na ba sanglit una sila nga nagka-esena sa "Kiss Flick" challenge sa Starstruck 3.

Apan dali nga mitubag ang duruha nga nag-abot lang sila didto sa 168 Station sa T. Morato tungod kay pareho sila nga nag-standby lang una didto samtang naghuwat sa oras sa ilang rehearsal sa production number karong gabii atol sa Final Judgement.

* * *

Hapit na molarga paingon sa New York sila si Jennylyn Mercado ug Mark Herras alang sa shooting sa ilang umaabot nga soap opera.

Maoy hinungdan nga labihan ka puno karon sa schedule sa duruha diin si Mark walay puas sa pag-promote sa iyang dance album nga bag-o lang nahimong double platinum.

Misamot kini ka lisud sanglit on location pa ang episode nila ni Pauleen Luna nga "My Darling Mermaid" didto sa Anilao, Batangas,alang sa season 10 sa Love to Love.

Busy usab si Jennylyn sa pag-promote sa theme song sa Moments of Love diin naka-duet niya si Janno Gibbs gawas pa nga gipaspasan usab karon ang paghuman sa iyang labing bag-o nga album ubos sa GMA Records.