Ruffa gisugo ni Yilmaz

Ang bana ni Ruffa Guttierez nga si Yilmaz Bektas maoy nagsugo niya aron mopahigayon og kalihukan aron makatabang sa mga biktima sa landslide sa Leyte human makita niini ang nahitabo pinaagi sa CNN.

Maoy hinungdan nga karong Marso 18 sa buntag didto sa 3rd level sa Market Market panguluhan ni Ruffa ang "A Celebrity Bazaar For Leyte," diin gikatakda nga motambong silang Sharon Cuneta, Gretchen Barreto, Donita Rose, Arnell Ignacio ug uban pang sikat nga mga artista.

Ang megastar misaad nga iyang dad-on ang mga gamit ni KC nga wala pa nila mabaligya last year samtang si kanhi Senador Loren Legarda misaad nga iyang dad-on ang iyang mga blazzers ug mga sapot nga mahimong ibaligya.

Misaad usab ang magtiayong Richard ug Lucy Gomez nga motambong ug magdala og mga gamit nga mahimong ikabaligya samtang dunay giandam nga libreng pasundayag ang ubang mga artista alang niadtong mopalit unya didto sa maong bazaar.

Si Ricky Reyes gikatakda usab nga motanyag og libreng haircut ug 15 minute back massage alang sa mga customers.

Matud ni Ruffa nga ang tanang halin ihatag nila ngadto sa mga biktima sa landslide pinaagi sa Philippine National Red Cross ug Shining Light Foundation samtang naglaraw ang kanhi beauty queen nga makataak gyud ngadto sa Leyte kuyog ang iyang mga higala aron mapadangat ang ilang mga donasyon.

* * *

Magsugod na karong gabii ang labing bag-ong variety/gag show sa ABS-CBN, ang "Gudtaym," nga langkuban sa unom ka mga "Pinoy Big Brother" housemates nga sila si Sam Milby, Chx Alcala, Cass Ponti, Franzen Fajardo, Jayson Gainza ug Uma Khouny kauban usab sila si Vhong Navarro ug Toni Gonzaga.

Giangkon ni Cass atol sa pagpakighinabi sa PangMasa nga medyo nakulbaan sila tungod kay ang "Bubble Gang" nga nakagamot na og maayo maoy ilang kaatbang.

Apan miingon siya nga dako kini nga hagit alang nila dungan sa pagklaro nga dili sila magpalupig sa tumang kasayon lang.

Si Frasco Mortiz, nga nahimo na usab nga director sa "Goin' Bulilit" maoy mogunit ning nahisgutan nga gag show diin namahayag ang nahisgutan nga dili sila makigkompetensya kundili buot lang sila nga makahatag og kalingawan sa mga tumatan-aw.

* * *

Ikaduhang adlaw na kagahapon nga wala mulugwa ang Sex Bomb sa "Eat Bulaga," apan walay bisan usa nga buot moluwat og pamahayag kalabot niini.

Tsika sa PangMasa nga lakip sila si Vic Sotto ug Joey de Leon nagdumili usab pagluwat og komento kagahapon ug igo lang miingon nga niadtong Miyerkules wala na gyud nila igkita ang "SexBomb"

Samtang dili pa matino unsa ka seryoso ang taho nga sa dili madugay ila ra unyang ipahibawo kanus-a ang audition alang sa mga bag-ong dancers nga matud pa maoy ikauban ni Sugar kinsa gitumbok nga gikalagotan karon og maayo sa kanhi niya mga kauban sa Sex Bomb gumikan sa pagkasipsip.