Izza Calzado gikalagotan

Nanawagan si Izza Calzado sa mga fans sa love team ni Karylle ug Dingdong Dantes nga dili siya maoy kasilagan kon silang duha ni Dingdong maoy magkadayon sa pelikulang 'Moments of Love."

"Huwag silang magalit sa akin, hindi ko sinisira ang love team nina Dingdong (Dantes) at Karylle. Sana maintindihan nilang management decision ito at nagtatrabaho lamang kami, walang personalan," pagpasabot pa ni Izza atol sa presscon alang sa nahisgutang pelikula sa GMA-7.

Kini tungod kay nagsigig bagutbot ang mga fans nila ni Karylle ug Dingdong nga karon inanay na nga naglagot kang Izza ilabi na kay sa poster mas dako ang nawong sa naulahi itandi sa kang Karylle.

Apan si Karylle igo lang mikatawa dayong ingon nga importante ang gamay niya nga picture sa poster apan og ngano matud pa niya kini maoy angayan nga atangan sa ilang mga fans pinaagi sa pagtan-aw sa nahisgutang lilas.

Matud ni Karylle nga sa unang adlaw pa lang sa shooting gipasabot na silang daan ni Ms. Anette Gozon Abrogar presidente sa GMA Films nga dili ang love team nila ang pambato sa pelikula kundili ang ilang acting ability ingon man ang kanindot sa istorya niini.

March 29 pa ipasalida ang maong pelikula apan plano nang daan sa GMA Films nga ibaligya kini ngadto sa gawas sa nasud hinungdan nga gi-dub na kining daan.

* * *

Dunay duha ka kaso nga giatubang ang housemate nga si Cassandra Ponti ug kini naggumikan sa paglapas niya sa mga nalatid sa kontrata nga iyang gipirmahan kaniadto.

Ang unang kaso giduso sa kanhi talent manager ni Cass nga si Aries Soriano ug kini tungod kay matud pa wala mopahibaw ang nahisgutan nga housemate ug wala gyud mananghid nga mosalmot siya sa PBB last year.

Ang ikaduha nga kaso mao ang gipasaka sa Leo Films tungod kay matud pa duna usab diay napirmahan nga kontrata si Cass balig tulo ka tuig ubos sa nahisgutan nga film outfit.

Samtang ang nakaginhawa karon og mabaw mao ang celebrity housemate nga si Aleck Bovick sanglit wala ihinayon sa iyang kanhi manager nga si Coco Simmo ang bahad niini nga kaso batok sa nahisgutan.

Kahinumduman nga mihulga si Coco kaniadto nga sa higayon nga makita niya nga motikang si Aleck sa "Bahay ni Kuya" dili siya magpanuko pagpasaka og kaso batok sa aktres sanglit wala pa mapupos ang gipirmahan nga kontrata tali niya.

Apan mag-grand finals na lang ang PBBCE karong Abril uno walay kaso nga gipasaka si Coco batok kang Aleck ug medyo nagpakahilom na lang kini sa pagkakaron.