Director sa Extra Challenge nangluod, mi-resign

Maayo na usab ang pagtinagdanay nila ni Ara Mina ug Kempee de Leon gani guest ang aktres singer sa umaabot nga concert ni Kempee nga dunay uluhan nga 'IL KEEM-iyekero.".

Kahinumduman nga nakabaton og gap ang panaghigala sa duruha sa dihang gipanguyaban ni Kempee ang manghud ni Ara nga si Christine Reyes.

Ug aron matapos na ang isyu wala na lang ipadayon ni Kempee ang iyang tinguha ngadto unta kang Christine kinsa gihagawhaw karon nga maoy gipangulitawhan ni Governor Mark Lapid.

Kahinumduman usab nga kanhi manag-uyab si Ara ug Kempee.

* * *

Hagbay na nga gidungog nga gibugaw sa mga talent managers nga sila si Lito de Guzman, Katrina Paula, Richard Hinola, Tita Swarding, Kenneth, Jeffrey ug Clark Concepcion ang ilang mga binatonan nga sexy stars.

Nagbalik-balik nalang nga gisaw-an ang mga ngalan sa maong mga talent managers sa "bugawan issue" apan walay naghimpos nga imbestigasyon tungod kay matud pa duna usay mga tag-as og ranggo sa kagamhanan nga maoy nanalipod kanila.

Apan ugma sa gabii sa programang Showbiz Stripped ni Ricky Lo sa GMA-7, suwayan sa beterano nga kolumnista pagtugkad ang tinood nga estorya pinaagi sa halapad ug gipaladman nga pakisusi.

Tagsa tagsaon ni Ricky Lo paggaling ang mga detalye aron masabtan unsa katinuod ang mga taho nga ang mga sexy stars mismo maoy mohangyo sa ilang mga managers nga ibugaw sila aron pagsulbad sa ilang pinansyal nga panginahanglanon.

* * *

Mi-resign na isip director sa Extra Challenge si Rico Gutierrez gumikan kay matud pa sa taho nga nakutlo sa PangMasa gikapoy na ang nahisgutan sanglit dako kaayo og makaon nga oras ang nahisgutan nga reality show ug nabiyaan na niya ang uban niyang gimbuhaton.

Apan dunay nadawat nga taho ang PangMasa gikan sa usa ka suod nga higala sa director nga nagkanayon nga medyo nangluod si Gutierrez tungod kay bisan pa man sa kadugay na niya sa maong programa wala gayud siya makadawat og umento sa sweldo.

"Ilang taon na rin naman si direk Rico sa Extra Challenge at aminin mo, mataas ang ratings nito at mahirap ang shootings nito dahil inaabot ng ilang araw lalo na kapag out-of-town at out-of-the-country kaya tama lang na bigyan ng increase, e, hindi binigyan," pong pa source.

Gisuwayan pagkutlo ang reaksyon sa Extra Challenge production manager Melo Esguerra apan gikataho nga wala kini mutubag.