Pangandoy ni Amon

Usa sa labing bag-o nga nawong sa local entertainment. Giabibahan, gikagubtan ug gikahidlawan. Batan-on. Siya nagbaton og inosente nga panagway-buotan ug sanag nga tan-awon. Medyo dauton pa ang panglawas. Guapo- kana maoy sigurado. Mauwawon ug hinay og tingog. Sa matag tubag sa pangutana siya dunay ipataban nga tam-is nga pahiyom. Kining tanan maoy muhulagway sa pagkatawo ni Ramon "Amon" Alcantara Jr., disisais anyos ug lumad nga taga San Remegio Cebu.

Oktubre sa nakalabay nga tuig sa dihang naaninaw ang kaambongan sa nahisgutan nga bayong bayong isip usa sa mga sakop sa grupong friendster nga gipaila pinaagi sa variety show sa GMA-7 nga giuluhan og Oi. Sa dihang nabungkag ang Oi human mibiya si Bugz Daigo aron manimpad sa Starstruck samtang ang laing duha ka sakop kalit nga nangahanaw, si Amon maoy nahabilin ug gibansay sa management sa hosting. Dancing ang pambato nga talento ni Amon gani tungod niini naaghat siya sa pag-audition sa dihang gisugdan pa pagmugna ang Oi niadtong nakalabay nga tuig.

Gibutyag niya nga niadtong high school pa lang siya, kanunay sila nga mopasundayag sa tunghaan hinungdan nga nagaling ang iyang potensyal sa pagsayaw. Yuna pa, diin man diay siya nag-high school "Sa Pope John seminary," tubag ni Amon sa dihang nahinabi sa Banat Hugyaw didto sa GMA-7 Complex sa Nivel Hills niadtong nakalabay nga semana.Buot ba diay unta siya nga magpari hinungdan nga sa seminaryo siya mitungha? Mipahiyom siya una namahayag nga igo lang siya nga misuway og tungha sa seminaryo sanglit naengganyo siya sa dihang dunay mga taga seminaryo nga nangumpanya sa ilang tunghaan didto sa San Remigio kaniadto.

Wala man tuod siya mipadayon aron mahimong pari apan dayag sa sinultihan ni Amon ang disiplina ug respeto nga iyang nakat-onan sulod sa upat ka tuig niya nga pagpuyo sa seminaryo. Sama nalang sa dihang gipangutana unsay iyang buhaton kon masuta niya nga tigpakaaron ingnon ang iyang higala?

"I hate plastic people pero wala ra koy buhaton against nila. Depende nalang ni Lord." Si Amon mipadayon pinaagi sa paghulagway sa iyang kaugalingon isip "buotan kay gamay lang nga tandog or masabdan tika inig agi nako mag-sorry dayon ko nimo. Sa seminaryo sad nako nakat-onan ang pakighugoy hugoy sa akong palibot kay didto sa sulod kami man gyud maoy muona og duol kon dunay bag-o nga musolod, kami maoy makig-ila-ila ug makighigala."

Dunay gitas-on nga 5'7, si Amon nangangkon nga wala pa siyay hinigugma sa pagkakaron sanglit dili pa karon ang tukmang panahon alang sa maong matang sa relasyon. 'Siguro at the age of 20 pa ko manguyab kay bata pa kaayo ko. Importante nako nga makahuman ko og eskuyla," pong pa niya samtang subli na usab nga mibuhi nianang makadani niya nga pahiyom. Apan matud ni Amon nga sa higayon nga andam na siya nga manguyab buot niya nga "buotan ug mapinanggaon" ang babaye nga iyang higugmaon.

Sanglit bata pa, ang pagkanunay text sa iyang mga higala, pagduwa og computer ug usahay paglaag-laag sa nagkadaiyang malls ang mokaon sa iyang oras kong wala siyay tun-anan. Wala siyay curfew sa iyang giistaran nga balay sa iyang iyaan sa Basak Pardo sanglit matud pa niya sayo man siya nga mopauli diin alas-otso sa gabii ang labing dugay.

Nagtungha sa University of San Carlos isip freshman sa kurso nga Hotel and Restaurant Management damgo ni Amon nga makasakay og luxury liner isip chef. Matud niya naaghat siya sa ka maayo muluto sa iyang amahan diin paborito niya ang "humba" sa nauwahi. Apan mikatawa siya sanglit matud pa ni Amon dili gyud motug-an ang iyang papa unsaon niini pagluto ang humba kay buot ang iyang amahan nga siya mismo maoy makadiskubre sanglit HRM ang iyang kurso. Matud niya wala pa siya masayod kong hangtud kanus-a ang iyang pagpuyo sa kalibutan sa showbiz sanglit ang labing importante niya mao nga mahuman gyud niya ang iyang pagtuon.