Talk show queen Kris napalpak

Excited ang beauty ni Manay Lolit nga mabasa ang biography sa Cebuana beauty queen nga si Pilar Pilapil.

Ang maong libro nga gitagik mismo ni Pilar nagbatbat sa iyang kasinatian sukad pa sa dihang nag-antos siya sa matud pa niya mapasipad-on nga amahan ngadto na sa panahon nga namakak siya sa iyang edad sa dihang miapil siya sa Bb. Pilipinas ug maoy misalmot sa Miss Universe beauty pageant niadtong 1967.

Gibutyag usab ni Pilar sa walay paglipod-lipod ang iyang mga kasinatian isip artista ingon man ang mga pangan sa tanang mga lalake nga nalambigit niya.

Giapil usab niya ang panahon nga nahimo na siya nga renewed Christian hangtud na nga naminyo siya ngadto sa iyang bana nga si Leo Peñas niadtong 2002.

Giulohan og "A woman without a face-the life story of Pilar Pilapil," ang maong libro mapalit sa mga nag-unang bookstores sa nasud sugod sa ikaduhang semana sa Marso.

* * *

Wala matuman ni Kris Aquino ang saad niya ngadto sa iyang anak nga si Josh nga motan-aw sila sa Valentine Concert ni megastar Sharon Cuneta.

Hinungdan nga atol sa guesting sa megastar sa The Buzz niadtong Domingo gisukmatan niini si Kris tungod sa saad nga wala matuman.

Igo lang mikatawa si Kris sa dihang giingnan sa megastar nga dili maayo nga mosaad og usa ka butang nga dili matuman tungod kay makadaut kini sa kredibilidad.

Kahinumduman nga ato nang nabalita dinhi sa Banat Hugyaw nga misaad si Kris ngadto kang Josh nga motan-aw sila sa concert sanglit paborito sa bata ang megastar.

Ang maong saad nahimugso human nga atol sa guesting ni Sharon sa The Buzz alang sa promotion sa maong concert buot magpasabak ni Josh ngadto sa megastar atol unta sa live -interview.

Misugot lamang ang bata nga dili magpasabak ug moapil sa live interview human mibuhi si Kris sa maong saad.