Ate Vi supak sa Star Cinema

Supak si Mayor Vilma Santos nga gamiton sa Star Cinema isip title ang " I love You, Lucky" tungod kay matud pa siya lang ang bugtong dunay katungod nga molitok niini.

Matud ni Ate Vi siya lang ang dunay katungod sanglit mao kini ang iyang isulti sa higayon nga moparayeg siya ngadto sa iyang kinamaguwangan nga anak nga si Luis "Lucky" Manzano.

Ang tsika sa PangMasa mao nga duna nay gihinabi ang mayor aron dili magamit ang maong linya sa pamarayeg agig respeto ngadto niya ingon man usab ngadto sa iyang anak.

Gidugang sa mayor nga mahimo pa man nga mangita na lang ang Star Cinema og laing title.

Sa nasayran ang mao untang titulo maoy ipahaom sa pelikula ni Sandara Park ug Joseph Bitangcol kauban si comedy queen Ai-ai delas Alas.

Samtang buot na si ate Vi nga mag-shooting og pelikula apan wala pa mahatag sa Star Cinema ang tibook script sa estorya nga iyang pagabuhaton ubos sa nahisgutan nga film outfit.

Gawas pa wala pa usab niya maplantsa ang iyang schedule.

"Sana matuloy kasi miss na miss ko na ang magtrabaho sa pelikula.Matagal na kung tutuusin 'yung Mano Po 3: My Love. One year na ang nagdaan kaya gusto ko na ulit gumawa ng movie," pong pa ni Ate Vi nga nahinabi sa PangMasa atol sa induction sa Entertainment Press Society (ENPRESS) ning bag-o lang.