JayR nagnilabad

Posibling dili na makalugwa sa bisan asa nga show sa QTV27 ang prince of pop nga si JayR human siya gikatahong nagnilabad pinaagi sa wala pagtunga alang unta sa taping sa programang MMS.

Matud pa nga naglabad ang ulo sa usa ka staff sa MMS human wala mutunga ang prince of pop sa taping nga unta mitando naman kini ug plantsado na ang tanan.

Nagkadaiya ang mga palusot sa kampo ni JayR, una mao nga madugay ang singer tungod kay maggikan pa siya sa layong lugar apan nihapon na lang walay bisan anino sa prince of pop nga naaninaw.

Natarantar ang staff sanglit gikinahanglan nga matape na ang partisipasyon sa singer sanglit inig ka ugma na kini ipasalida hangtud nga dunay nakahunghong nga naa lang sa balay si JayR ug kasam-tangang nagpahuway.

Niining mga gutloa wala nay tubag-tubag si JayR sa mga tawag ug text message gikan sa staff sa MMS busa midesisyon sila nga adtoon nalang sa balay ang singer.

Bitbit ang mga ekipo alang sa taping milayat paingon sa balay sa singer ang staff sa MMS apan pag-abot nila didto giingong wala gyud mogawas si JayR bisan og giunsa og sampit.

Sa dihang gitawagan sa staff ang manager ug road manager sa singer managlahi ang tubag sa duruha. Ang una namahayag nga nibalibad na ang singer sa sayo pa sanglit duna siyay laing gimbuhaton niadtong adlawa.

Apan ang gikalibgan sa mga taga MMS mao og nganong dunay nitino nga nagpadulong na ang singer apan ma-late lang siya tungod kay gikan pa sila sa layong dapit.

Tungod kay wala man gyud nila igkita ang prince of pop bugtong si Katrina Halili ang nakaluwas sa tanan human kini musugot nga mag-taping bisan pa og alas tres na sa kadlawon.