Kakusang Franzen inggrato?

Duna na usay laing nabiktima ang impostor nga John Lapus ug siya mao ang singer nga si Champagne Morales.

Dili pa detalyado ang matang sa pagpangilad apan kon kahinumduman nga lakip ang comebacking star nga si Valerie Concepcion nailad na usab sa maong impostor,

Kahinumduman nga misakay sa sakyanan ni Valerie ang impostor nga John Lapuz sa dihang dunay show ang young star sa probinsya diin nanghumam og kwarta ang impostor.

Gitin-aw ni John nga nahimamat na niya ang iyang impostor diin nangayo na kini og pasaylo niya apan gisubli na usab ang modus operandi niini human nailad si Valerie.

"Maganda po ako sa personal. At dalawa ang sasakyan ko, Valerie Concepcion," tsika pa ni John Sweet Lapus.

Tungod niini nanawagan si Sweet John sa tanang mga artista ug pribadong mga indibidwal sa pagmatngon ug sa dili pagtoo gilayon.

* * *

Hapit diay matangtang sa cast sa umaabot nga teleserye sa ABS-CBN nga 'Kapitan Inggo" ang young star nga si Empress Schuck.

Suma pa sa taho sa PangMasa nga gihadlok siya (Empress) nga hulipan sanglit wala gyud kini moniwang bisan og giingnan na nga kinahanglan siya nga magpa-reduce.

Apan nangatarungan si Empress nga iyang gisunod ang kamanduan sa ABS-CBN apan matud pa niya dili gyud niya mahimo nga dili mokaon sanglit duna nay higayon nga ni-collapse siya gumikan sa ka gutom.

Hinoon nakasabot ra ang mga kadagkuan sa nahisgutang nga teleserye ug gihatagan pa siya og kahigayonan basta kinahanglan nga makubsan ang iyang timbang.

Ang trese anyos nga si Empress maoy nidala sa papel sa bata nga Cassiopea sa bag-o pa lang nahuman nga Etheria sa GMA-7 hinungdan nga hinay-hinay na usab siya nga naila.

* * *

Wala gihapoy puas ang pagpangayo ni PBB housemate Franzen Fajardo og pasaylo tungod sa iyang pagdoso og lain nga produkto sa t-shirt bisan pa og ang Hammerhead na maoy nagbiste niya sukad pa sa sinugdanan.

Nasayran nga nangluod ug nikaging ang mga kadagkuan sa Hammerhead human mipirma og kontrata ubos sa laing kompaniya si Franzen nga wala man lang mopahibawo agig pag-respeto.

"Mali po kami, dahil hindi man lang kami nagsabi sa kanila ng gagawin naming desisyon. Baguhan pa lang po kasi ako, kulang na kulang pa ako ng kaalaman, hindi ko naisip na puwede silang magtampo sa akin kahit trabaho lang naman ang ginawa ko at walang personalan," pasabot pa ni Franzen.

Kahinumduman nga sa dihang migawas na si Franzen sa "Bahay ni Kuya" ang Hammerhead maoy nagbiste niya alang sa iyang mga guesting ug wala mangayo og bayad o magpaabot nga bawsan.

"Naku, walang-wala po akong inisip na anuman nung pumirma ako ng kontrata sa iba, sa sobrang kawalan nga po ng masama kong iniisip, e, nakaligtaan kong magpaalam man lang at magsabi sa kanila," paniguro pa ni Franzen. - Ryan Mark