Roxie buot nga palayason si Rico

Mag edad na og usa ka tuig karong Pebrero 25 puhon si Antonia Sofia Julia Babao nga anak sa mga broadcasters nga sila si Julius Babao ug Christine Bersola.

Ang tsika sa PangMasa mao nga karon pa lang miabot na ang mga regalo o grasya alang sa bata sanglit tulo ka mga commercials ang gikatakda nga pagahimoon niini kauban syempre ang iyang inahan.

Una mao nga gi-renew sa EQ Diapers ang ilang kontrata sa inahan ug anak sanglit matud pa misaka ang kita sa maong produkto sukad nga ang duruha maoy endorsers.

Ikaduha mao nga ang inahan ug anak maoy gikuha sa Nestle Philippines alang sa Heath and Baby Wellness campaign diin makauban nila ang mga doktor ug midwives alang sa maong campaign.

Ikatulo mao nga gi-renew usab silang duha isip endorsers sa Aquasoft mineral water diin dunay upat ka mga dagkong billboards nga ipakayab unya didto sa kauluhan kalabot niini gawas pa sa commercial sa telebisyon.

Ug karon pa lang giplano na sa magtiayon ang birthday party diin Little Mermaid ang concept niini sanglit mahilig sa tubig si Antonia busa mag swimming unya ang ubang bata nga moapil sa selebrasyon sa unang sumad sa adlawng natawhan sa niini.

* * *

Dunay wala makauyon sa mga hagawhaw nga sa sulod sa 'Bahay ni Kuya" moangkon si Rustom Padilla sa iyang tinood nga pagkatawo.

Matud sa mga tigpaniid nga dili makatarunganon nga ang pagkatawo ni Rustom maoy utingkayon sanglit buotan gawas pa nga dili kini maoy issue nga angayan ibato ngadto sa aktor.

Kaniadto pa nga dunay mga huhungihong nga bayot si Rustom ug gani mao kini ang gitumbok nga hinungdan nganong nagkabuwag sila ni Carmina Villaroel apan gilimod na kini sa nahisgutan.

Miingon ang mga tigpaniid nga ang angayang utingkayon dili ang issue sa pagkalalake o pagkabayot ni Rustom apan kon ngano nga labihan niini ka daot og lawas.

Sigon pa ni kolum-nistang Ruel Mendoza sa PangMasa kon ang gender issue batok ni Rustom publicity lang aron motaas ang rating sa Pinoy Big Brother Celebrity edition angayan nga hunongon na kini.

Matud pa niya angayan nga angkonon na lang sa management nga hinay gyud ang rating sa PBB karon sanglit ang ubang mga housemates dili man tiunay nga mga celebrity gumikan kay makapila lang sila nakita sa telebisyon.

* * *

Samtang dunay mga nagtoo nga naguol si Roxie Barcelo nganong dili madayon ang eviction night ugma sa PBB tungod kay gusto na unta siya nga si Rico Robles ang una nga mapalayas.

Kini tungod kay giingong gisapot na siya sa mga pag-pacute ni Rico ngadto kaniya ug wala kini niya ikahimuot sanglit maguba ang iyang konsentrasyon sa pag-atubang sa nagkadaiyang challenges.

Nasayran na nga dunay kagahapon ang duruha diin nanguyab si Rico kang Roxie kaniadto samtang nag-intern pa ang naulahi sa estasyon sa radyo diin disc jockey ang nahauna.

Misurok ang dugo ni Roxie sanglit sa dihang mihalad si Rico sa iyang gugma duna pa diay girlfriend ang naulahi nga gikalagot ni Roxie og maayo.

Walay problema alang kang Roxie nga manguyab kaniya og balik si Rico basta adto na sa gawas sa 'Bahay ni Kuya" aron dili maguba ang iyang konsentrasyon ug siya maoy mogawas unya nga mananaug.

Kahinumduman nga boluntaryo nga mibiya ang atong paisana nga si Angela Calina human siya masayod nga gilungkab ang iyang giabangan nga balay diha sa barangay Mabolo.