Mga linghud nga taghoy sa damgo

Nagmalambuon na ang grupo sa mga mang-aawit sa University of San Jose Recoletos elementary division nga gitawag og "Little Chanters." Busa sa pagkakaron bugtong tumong nila mao nga makapasundayag gawas sa tunghaan sanglit wala pa nila kini masinati sukad sukad. Bag- o lang sila nga natukod apan ang 30 ka mga myembro niini nagpakita na og kahanas dili lang sa pagkanta kondili lakip na sa pag-arte ug pagsayaw.

Ang 'Little Chanters" tipik lang sa daghan nga mga grupo nga naglihok sulod sa USJR Basak campus. Kini gitumong aron maumol ang tinaguang talento sa mga tinun-an aron mas mapalambo pa kini. Dinhi nagsugod ang hagit unsaon pag-amo ang mga bata nga mas buot pa nga magduwa kaysa magbansay bansay sa mga kanta nga gipahaum alang nila.

Adunay 30 ka miyembro nga pulos mahiligon sa pagkanta ang maong grupo.

Nindot kaayong pamati-on ang bugnawng tingog sa Little Chanters ug haniti usab kaayo silang mopahigayon og pasundayag diha ibabaw sa entablado atubangan sa mga tumatan-aw. Hugyaw sila kon buot huna-hunaon sanglit kasagarang miyembro mga bag-o sa grupo gani uban kanila karon lang makasinati nga mopasundayag.

Ang USJR adunay nagkadaiyang mga club diin usa niini mao ang singing club. Ang mga estudyante sa maong tunghaan giaghat gyud sa pag-apil sa mga clubs para madiskobre ang uban nilang mga talento. Sa singing club diha namugna ang Little Chanters kinsa si Hendrieta Servillon maoy kanhi moderator o trainer niini.

Apan karon si Richard Mascardo kinsa mahiligon usab sa musika ang moderator sa grupo tungod kay si Servillon gisangonan og laing gimbuhaton.

Dili lang kadtong makamao nang daan mokanta ang dawaton sa grupo apan lakip na ang mahiligon sa kanta ug desidido nga makakat-on. Diha lang sulod sa school campus makapahigayon og pasundayag ang Little Chanters, niadtong Disyembre nagpahigayon sila og back to back show sa elementary dance troupe.

Apan ang administrasyon sa tunghaan adunay panglantaw nga makapahigayon og pasundayag ang grupo para ang mga miyembro niini makasinati usab og exposure sa laing lugar.

Ang miyembro sa Little Chanters dili libre sa ilang tuition diin ang tumong lang sa tunghaan nga madiskubre ug mapauswag sa mga estudyante ang ilang mga espisyal nga talento.

Kasagaran nga kantahon sa grupo mga love songs ug religious apan kung cultural show ang ilang ipahigayon mga cultural songs usab ang ilang awiton.

Matag adlaw lang Biyernes magkita ug maka-ensayo ang grupo sa pagkanta tungod kay ang academic maoy gipasentro sa administrasyon sa mga estudyante.