Heart mobalhin sa Kapuso

Managlahi ang rason nga nanggawas karon nganong wala na si Heart Evangelista mo-renew og kontrata ubos sa Star Magic ang talent management arm sa ABS-CBN.

Una mao nga si Heart mismo maoy nagdumili na sanglit gibati niya nga gipasagdan siya sa Star Magic taliwala sa mga intriga nga gibato ngadto niya ilabi na ang isyu nga nimabdos siya.

Laing version mao nga ang Star Magic mismo maoy wala nay gana kang Heart busa nakahukom sila nga dili na lugwayan pa ang kontrata sa usa sa kanhi nila paborito nga talent.

Nasayran nga sugod niadtong Pebrero uno ang Genesis Management na maoy nagduma kang Heart sama usab sa pagduma niini kang Arnell Ignacio nga bag-o lang nibalik sa Kapuso network.

Tungod niini nagdahunog karon ang pagtoo nga posibling molayat na usab si Heart paingon sa nataran sa GMA-7 kon ingon niini nga nangluod na siya sa network nga mao kanhi ang nag-amoma kaniya sukad pa kaniadto.

Tataw hinoon nga makita pa si Heart sa part two sa Panday sanglit duna siyay gipirmahan nga kontrata kalabot niini ug wala pa mapupos.

* * *

Kontrobersyal gilayon ang entrada ni Aleck Bovick sa Bahay Ni Kuya niadtong Domingo sanglit mibahad ang kanhi niya manager nga si Coco Simmo nga iyang pasakaan og kaso ang aktres ingon man ang abs-cbn mismo.

Kini tungod kay matud ni Coco wala pa mahuman ang gipirmahan ni Aleck nga kontrata ubos niya isip talent manager busa duna pa siyay katungod sa aktres.

Kahinumduman nga si Coco maoy nagkaplag kang Aleck hangtud nga nahimong best actress sa FAMAS ang naulahi mga tulo na ka tuig ang milabay pinaagi sa pelikulang "Tampisaw."

Niadtong nakalabay nga tuig nirampa si Aleck sa senado ug nagpakitabang mismo kang Senador Jamby Madrigal dungan sa pasangil nga giabuso siya ni Coco Simmo.

Samtang ang mga kabayotan sa kauluhan nanganti nga sundan gyud nila ang matag gabii sa mga panghitabo sa "Bahay ni Kuya" basin nalang og dinhi ning higayonan hingpit na nga moangkon si Rustom Padilla nga siya miyembro gyud sa federacion.

Kahinumduman nga usa sa mga intriga nga nibuto kaniadto sa ilang panagbuwag ni Carmina Villaroel mao nga gikatahong natino sa naulahi nga matud pa bayot ang iyang kanhi bana- usa ka pasangil nga gibalik balik na paglimod ni Rustom.

* * *

Medyo gidemalas si comedy queen Ai-ai delas Alas sa pagsugod sa 2006 sanglit gitangtang na ang iyang sitcom nga "Juan and Only" tungod hinay ang rating niini.

Busa bisan naa pa sa maong show ang blockbuster stars nga sila si Toni Gonzaga ug Vhong Navarro si Ai-ai gihapon ang gibasul nganong nag-goodbye ang maong sitcom niadtong katapusang Sabado sa buwan sa Enero.

Naturalmente naguol si Ai-ai sa maong kalambuan sanglit mupay nagnihit ang iyang show lain na usab nga raket niya ang natsugi.

Apan nangatarungan si Ai-ai nga dili siya angayan nga basulon sanglit nahuman na ang kontrata alang sa mao nga sitcom busa wala na kini lugwayi pa.

Ang tuig 2004 ug 2005 maoy labing swerte nga tuig ni Ai-ai sanglit didto mihumot og maayo ang iyang bitoon human nangharos sa takilya ang 'Tanging Ina" hinungdan nga gihimo pa kini nga sitcom nga giuluhan og "Tanging Ina the TV."