Manny gigamit, daw robot nga nisugot

Nakakomentaryo ang atong kahugyaw nga si kolumnistang Lee B Og sa Pang Masa gumikan kay matud pa niya gigamit gyud og maayo si Manny Pacquiao sa mga tawo nga dunay kaugalingon nga motibo atol sa motorcade niini didto sa nagkadaiyang dapit sa kauluhan niadtong Byernes.

Sama na lang pananglit sa pag-abot ni Manny didto sa compound sa GMA-7 diin matud pa gipugos gyud ni Arnold Clavio ang boxing champ pagpasul-ob sa jacket ug kalo nga dunay tatak nga Kapuso samtang sa didto na usab ang boksidor sa abs-cbn giingong mikatkat si Willie Revillame sa float ug gisugo ang nahauna pagpasinggit og "Wowowee Manny."

Matud sa kolumnista klaro kaayo nga nagamit si Manny niadtong mga panahona apan sanglit lab-as pa man ang kadaugan sa naulahi dili pa niini mabatyagan ang gibuhat sa mga tawo nga iyang gikahibalag ug nagpalibot kaniya sa pagkakaron.

Busa matud pa ni Og mas maayo unta nga isinggit nga " Tawo si Manny ug dili robot" aron makaamgo ang mga tawo sa ilang sayop ug pagpahimulos.

* * *

Padayon pa gihapon nga nangita og babaye nga contestant ang production staff sa Pinoy Big Brother alang sa celebrity edition niini nga sugdan na karong Sabado Pebrero kwatro.

Kini tungod kay ang kadaghanan sa mga babaye nagduhaduha sanglit nabalaka sila nga mabastos sama pananglit sa posibilidad nga mapareha sila sa mga naunang contestants sa maong bangga diin matud pa gibusohan sila ingon man gipistahan ang ilang mga sexy nga hulagway nga nagpasad sa internet.

Hinungdan nga wala pa makompleto ang line up alang sa mga babaye nga contestants dungan usab sa pagbutho sa taho nga ni-back out si Rossana Roces gikan sa maong contest sanglit gigamyan ra siya sa talent fee nga iyang madawat unya.

Hinuon nigawas na nga sigurado na gyud nga moapil sa PBB Celebrity edition ang kanhi kontrobersyal escort nga si Keanna Reeves kansang kaliwatan naggikan sa dakbayan sa Danao.

Giingon laing gikahadlokan sa mga babaye nga contestants mao nga tawgon unya sila nga mga "laos" sanglit gidungog na nga ang mga mangapil mga wala nay career o dili na kaayo sikat.

Samtang dunay taho nga tulo ka mga inilang personalidad duha niini naggikan sa telebisyon ug ang laing usa inila nga singer ang gikatahong kumpirmado na usab nga nalakip sa line-up apan dili gyud mahimong nganlan hangtud sa gabii nga masulod na sila sa balay or else mataktak sila gikan sa contest insigeda.