'Bombo' sa kamatuoran ug kausaban

Usa siya sa mga bag-ong sulbong nga mga kometarista sa Sugbu apan nagbaton na og tukmang ka-agresibo ug kaisog. Walay lipod-lipod ang iyang komentaryo bahala nag kinsay maligsan basta nagsubay sa tinood ug tukma nga detalye. Batan-on apan walay kuka hadlok pagkaplag sa matuod ug pagpakigbatok sa mga badlongon tungod ug alang sa kamatuoran. Siya walay lain kondili ang maabtik nga station manager sa radio dyMF o mas nabantog nga Bombo Radyo Cebu nga si Ike Durano.

Sa sayo pa duna nay mga komentaryo gikan sa publiko nga nagsunod-sunod si Ike sa nabantog na usab nga tri-media personality sa Sugbu nga si Bobby Nalzaro. Matud sa mga maki-radyo gikopya ni Ike lakip na ang tingog ug estilo ni Nalzaro sa pagpanibya. Miiknat ang kilay ni Ike sa pagkadungog niining maong obserbasyon dungan sa pagtin-aw nga nag-una kaniya sa duyan si Bobby apan nungka nga iya kining gisunod o gikopya.

"Do not judge us because were young, do not judge us based on what you hear because ako wa man tay purpose pag-imitate anang mga tawhana. As I've said wakoy plano nga musakay sa ilang claim sa ilang kaugalingon. I'm here to serve.

Ang ato lang pag-serbisyo sa mga tawo. Ang-ang man og akong pugson akong tingog nga magbinayot ka diha o usbon man ang akong tingog nga mao man gyud nay malibkas sa akong baba."

Simple mananina ug labaw sa tanan maabi-abihon, sayon duolon ug matinagdanon. Hilomon usab siya diin sa mga tigom motingog lang siya kon gikinahanglan. Kini maoy imahen nga nagbukot sa pagkatawo ni Ike. Makapahimout nga palandungon nga ang pagsulod sa media dili maoy orihinal nga plano sa nahisgutan. Gibutyag ni Ike nga sa nagpanuigon pa lang siya og kuwatro anyos ang pag-alagad sa Ginoo isip pari maoy una niyang gipangandoy. Niadtong mga panahona nagserbisyo na siya sa simbahan isip sakristan nga maoy nagpasamot sa iyang interes pagsulod unta sa seminaryo.

Naggikan sa dakbayan sa Danao ang pamilya ni Ike diin manghud sa iyang great grandfather si kanhi kongresista Ramon Durano Sr. nga lolo usab ni Tourism Secretary Ace Durano. Sa pagtaak niya sa wanang sa kaalam sa University of San Carlos nausab ang iyang pangandoy diin naglabi na ang iyang tinguha nga iyang mapaambit ang edukasyon sa informal nga paagi. Ang pagpanibya maoy nisantop sa huna-huna ni Ike.

Gawas niini damgo usab ni Ike nga mausab ang mga hiwi ug sayop nga mga aktibidad ug binuhatan nga nanghitabo sa iyang palibot hinungdan nga sa mga tuig sa iyang pagkatinun-an sa kurso nga Political Science gitukod niya ang Society of Democratic Reformist of the Philippines.

Sanglit kumbinsido siya nga ang pagbaton og kaalam walay kinutuban padayon usab siya karon nga nagtungha diin 4th year na siya sa abogasya diha sa College of Law sa University of San Jose Recoletos.

Tuig 2000 siya nasakop sa pamilya sa Bombo Radyo Philippines dinhi sa Sugbu diin nagsugod siya isip patrol beat reporter hangtud nga nahimo siyang regional beat reporter. Wala magdugay gitudlo siya isip investigative reporter ug sa samang higayon gihatagan siya og programa ang "Bombohay Bigtime," matag buntag.

Dinhi milutaw ang tinaguan nga talento ni Ike dinuyugan usab sa kahibaw nga iyang nakutlo gikan sa tunghaan. Sulod lang sa lima ka tuig nisutoy si Ike paingon sa tumoy sa kalampusan human siya gitudlo nga station manager sa pangidaron nga baynte sais anyos niadtong nakalabay nga tuig.

Daghan nang hulga nga nadawat si Ike gikan sa mga tawo nga naligsan o gipaitan sa iyang mga komentaryo. Lakip ang iyang mga ginikanan wala makauyon ug nabalaka na sa iyang seguridad apan wala silay mahimo sanglit hingpit na ang iyang hukom nga ipadayon ang nasugdan nga kawsa sa pagbugtaw sa kamatuoran. Alang kang Ike ang mga hulga sa iyang kinabuhi nga iyang nasugatan usa ka dakung hagit nga dili angayang palabyon. Gidugang niya nga ang pagpalanog sa mga tingog sa naa sa ubos nga hut-ong sa katilingban ang iyang misyon bisan pa og ang bugti niini mao ang iyang kinabuhi. Kini tungod kay pinaagi niini nabatunan niya karon ang katagbawan.