Alessandra gibatig kaanyag

Perte rong taasa sa buhok sa aktres nga si Alessandra de Rossi human siya giisip karon nga "Box Office Queen of Asia" tungod sa kalampusan sa iyang international film nga giuluhan og "The Maid."

Niadtong Disyembre pa nato gikataho dinhi niining atong mga pahina nga isalida na dinhi sa Pilipinas karong January 25 ang maong pelikula busa dili na na balita alang sa nagsunod sa Banat Hugyaw.

Ang labing bag-ong kalambuan mao ni: Box office Queen ang guapa nga Alessandra sanglit tulo ka semana nga number 1 sa tanang sinehan didto sa Singapore ang maong pelikula.

Dungan niini lima usab ka semana nga nag-number one ang dvd copy sa maong pelikula busa giisip ang Fil-Italian actress nga maoy rayna sa Asya sa pagkakaron.

Nanghinaut si Alessandra nga paluyuhan usab sa mga Pilipino ang maong pelikula inig abli unya niini sunod semana tungod kay matud pa niya maka-uuwaw kon dinhi na hinoon sa iyang balwarte kini mapalpak.

Suspense thriller ang tema sa maong pelikula diin si Alessandra domestic helper gikan sa Pilipinas nga maoy nakadiskubre sa hinungdan nganong ang mga katabang nga iyang gipanghulipan kalit nahanaw nga walay igong hinungdan.

Dungan niini gipahibaw ni Manny Valera, talent manager ni Alessandra nga gitanyagan na ang naulahi aron himoon ang part two sa maong pelikula apan wala pa mahibaw-i kon dawaton ba kini sa aktres.

Una niana gipalanog ni Ale-ssandra ang labihan niya nga pagdayeg sa Singaporean film outfit nga naggama sa iyang unang international film tungod kay gawas nga Hugyaw ang talent fee makamao usab kini nga mo-amuma og artista.

Matud niya dose ka oras lang ang shooting nila matag adlaw diin kon molapas sila og lima ka minuto lang mangayo na dayon og despensa ang producer samtang dili usab sila mag-shooting kon lapoy sila sa nakalabay nga gabii.