Camille Pratts mag-bold na?

Daghan ang nangutana karon kon hingpit na ba nga maghubo ang kanhi child star nga si Camille Pratts aron pagpukaw sa nagduka niya nga showbiz career.

Kini tungod kay si Camille kinsa mas naila kaniadto sa mga pelikulang pampamilya sama sa "Sarah ang Munting Prinsesa" ug "Ang Prinsesa at ang Pulubi" maoy gikatakda nga cover girl sa February issue sa For Him Magazine o FHM.

Gikatahong daghan ang naghinamhinam nga makakita unsa ka-sexy ang mga pictures ni Camille alang sa nahisgutang magazine diin international photographer nga nagbase sa Australia ang gikontrata alang sa pictorial.

Daghan usab ang nahingangha gumikan sa labing uwahi nga kalambuan sa showbiz career ni Camille tungod kay wala sila magdahum nga musogot kini nga himoong cover alang sa usa ka panlalake nga basahon.

Daghan ang nagtoo usab nga posibling career move lang kini ni Camille sanglit dili ikalimod nga ang ubang young stars nga nisugot nga himoong cover sa FHM kaniadto misamot man og kainila ug giuwan og mga proyekto.

Sama nalang ni Angel Locsin nga maoy sexiest celebrity alang sa FHM niadtong 2004 kinsa usa na karon sa labing sikat nga young star. Nisunod usab si Bianca King last year diin human niini giuwan siya og daghang proyekto usa na niana ang pagkahimo nga regular host sa 3R nga makita sa QTV-11 matag Sabado.

Nauna na nga nidala og mature roles ang kadungan ni Camille nga si Angelica Panganiban kinsa dunay lovescene kauban si Jericho Rosales sa pelikulang "Santa Santita" niadtong 2004 diin gidayeg og maayo ang acting nga iyang gipakita.