Ang maanyag nga boksidor

Usa ka babaye nga nabilanggo sa lawas sa usa ka lalake. Nanghawod siya sa kalibutan sa mga lalake isip usa sa labing maayo nga kickboxer sa nasud sa Thailand pipila ka tuig na ang milabay. Siya walay lain kondili si Parinya Charoenphol ang una ug nagbinugtong nga boksidor nga nagpa-usab sa iyang kinatawo ngadto na sa hingpit nga pagkababaye.

Si Parinya mas naila kaniadto sa Thailand isip Nong Toom kinsa daghan og gipahapla nga mga kickboxers didto sa nagkadaiyang probinsya didto sa maong nasud. Ang kinabuhi ni Noong gipakita pinaagi sa pelikulang "The Beautiful Boxer" ubos sa direksyon ni Ekachi Uekrongtham ug bag-o pa lang gipasundayag sa mga sinehan dinhi sa Sugbu.

Nganong angayan man nga mulugwa si Nong Toom niining atong pahina karong adlawa? Kana tungod kay Hugyaw kaayo ang iyang estorya sanglit dili basta basta ang mga pagsaway nga iyang nadawat tungod kay gipasanginlan siya sa iyang mga katagi-nasud nga naghugaw-hugaw ug nagbugal-bugal sa imahe sa kickboxing nga naila didto nga Muay Thai. Gawas pa niana haom siya niining maong pahina sanglit usa na siya karon ka respetado nga actress ug in demand nga model nga nagbase sa Bangkok.

Si Nong lumad nga taga Chiangmai province sa Northern Thailand diin sa wala pa siya magpa usab sa iyang kinatawo niadtong 1999 sa baynte dos niya ka mga away ang iyang nadaug. Pobre ang ilang pamilya diin sukad pa sa iyang pagka bata nakabantay na ang iyang inahan nga usa siya ka bayot gumikan kay hawod kaayo siya nga musonod sa bisan unsa nga sayaw. Hinungdan nga gitudloan siya sa iyang inahan nga dili magpadaug-daug ni bisan kinsa kay dili sa tanang higayon dunay makapanalipod niya.

Sa dihang bata pa siya gipasulod siya sa iyang mga ginikanan sa usa ka monghe tungod kay buot sila nga mamahimo siyang misyonaryo. Nasakpan si Nong nga magsige og biya gikan sa monghe busa gisilutan siya pinaagi sa pagkuyog-kuyog sa usa ka misyonaryong mananambal kansang panaw walay katapusan. Apan pagligid sa taas nga panahon nakahukom ang misyonaryo nga papaulion nalang si Nong aron mabuhat niini ang mga plano niya sa iyang kinabuhi.

Sa dihang bayong bayong na nagsugod siya sa iyang training alang sa Muay Thai diin sa sinugdanan wala siyay interes niini tungod kay alang niya bayolente ang maong gimbuhaton. Sa kadugayan nakat-on paghigugma si Nong sa nahisgutan nga self-defense human siya gipatan-aw sa asawa sa iyang coach unsa kini kanindot basta maggikan sa imong kasing-kasing ang matag nimo lihok. Didto nagsugod ang grabe nga training alang kang Nong ug wala madugay nagsugod na siya pagdaug sa bisan asa nga sangka.

Kakunsabo ang asawa sa iyang coach hinay-hinay nga niladlad sa iyang kapa si Nong diin gitudloan siya unsaon paggamit ang make-up. Nasakpan sila sa iyang coach apan giingnan siya nga dili niya igsapayan bisag unsaon pa niya pagpintal ang iyang nawong basta makig-away lang siya ibabaw sa ring nga sama sa bangis nga lalake. Hinungdan nga walay kokalooy si Nong pagpahapla sa iyang mga kontra sanglit kanunay nga magbalik balik sa iyang panumduman ang gitudlo sa iyang inahan ug coach nga kinahanglan nga dili siya magpadaug-daug.

Daghan ang nagtoo nga drama ra kadto ni Nong nga mag-make-up siya sa tanan niyang pakig-away ibabaw sa ring busa daghan ang nanghinaway niya apan wala kini niya panumbalinga. Daw gisungog siya sa kahigayonan tungod kay una siya makaabot sa nasudnong bangga gikinahanglan nga makig-away una siya sa usa usab ka maayo nga boxer kinsa kauban niya kaniadto sa training ug gihigugma sa hilom. Apan mibalhin ang nahisgutan og lain nga training camp hinungdan nga gikinahanglan nilang magsangka.

Giilad siya sa maong lalake tungod kay nagpakilooy kini niya nga magpapildi nalang siya aron ang premyo magamit sa maong lalake alang sa haya ug lubong sa iyang inahan.

Desidido na si Nong nga magpapildi diin nagpakulata siya og maayo atol sa ilang sangka apan gikasab-an siya sa iyang coach ug gipangutana unsay hinungdan nganong daw walay kinabuhi ang iyang mga patid ug sukmag. Gisulti ni Nong ang tinood ug nasorpresa ang coach tungod kay sa nakalabay pa diay nga tuig namatay ang inahan sa maong lalake busa sa kalagot ni Nong diretso niyang gipakuyapan ang naulahi. Human niadto nakig sangka na siya sa nasudnong titulo diin gibiay-biay ug gibugal bugalan siya sa iyang kontra gumikan sa iyang pagkabayot. Pilay estorya si Nong maoy nidaug hangtud nga milangyaw sila sa nasud sa Japan diin iyang gipildi si Kyoko Inoue, ang labing maayo nga babaye nga wrestler didto sa maong nasud. Gumikan sa maong kadaugan natuman na sa katapusan ang iyang damgo nga mamahimong hingpit nga babaye. Makapahinuklog ang maong esena sanglit ang iyang amahan mismo maoy nipirma isip pagtugot sa pagahimoong operasyon kinsa sa sinugdan nagdumili gumikan sa kabalaka nga dunay dautan nga mahitabo sa iyang anak.

Sa kinatibuk-ang pagkasulti, nindot ang maong salida kansang papel ni Nong gihatagan og kinabuhi ni Asanee Suwan nga usa usab ka maayong kickboxer kinsa nag-training balig usa ka tuig sa ballet, make-up, personality development lakip na unsaon pagpahamis sa kutis. Usa kini ka salida nga nagbugtaw sa mga kalisdanan sa usa ka tawo kon unsay angay niyang ipatigbabaw ang pagkalalake o ang pagkamahinhin ibabaw sa ring, usa kini ka duwa sa pagbati labot kon unsa ang angay masunod, huna-huna o pagbati, damgo ug realidad o pagpakig-away o pagpapuyo nga hapsay? Labaw sa tanan usa kini ka pelikula nga nagtudlo nato nga ang pagkatawo dili masukod sa unsay makita apan sa kon unsa ang emosyon nga naghari diha sa atong mga kasingkasing.