Christine Reyes magpasexy na

Andam na nga magpasexy ang kontrobersyal nga Starstruck graduate nga si Christine Reyes duha ka tuig gikan karon diin iyang gipalanog nga naglaraw siya pagsunod sa mga tunob sa iyang maguwang nga si Ara Mina.

Apan dali niyang giklaro nga dili gyud niya ibuyangyang ang tanan niyang tinaguan ug igo lang niyang hadla hadlaon ang imahinasyon sa mga anak ni Adan pinaagi sa pagsul-ob og sexy costumes.

"Dadaan talaga ako don pero hindi lahat ipakita ko siguro sexy lang sa outfit," tubag ni Christine sa dihang nahinabi sa Cebu press didto sa V-hire terminal sa SM-Cebu diin dunay gipahigayon nga pasundayag ang pipila ka Kapuso Stars agig pagduyog sa hudyaka sa Sinulog festival.

Gani nagpasexy naman siya sa 2006 calendar nga gigama sa GMA-7 aron ipaila ang ilang roster of talents diin nakigtige siya nila ni Katrina Halili ug Chynna Hortaleza.

Gibutyag usab niya nga usa na katuig nga dunay offer ang FHM magazine niya aron siya maoy I-feature sa cover apan wala pa kini niya dawata sanglit minor pa man siya tungod kay disisais anyos pa lang siya sa pagkakaron.

Gitin-aw ni Christine nga lahi sa imahe nga gipilit sa publiko ngadto sa iyang pagkatawo sa nakalabay nga tuig, dili siya badlongon kon trabaho na ang hisgutan.

"Hindi ako pasaway sa work. Siguro sinasabi nila na pasaway ako dahil suplada ako minsan. At saka makulit ako. It makes me angry pag hindi ako pinapakain," asoy pa niya nga gidunganan og pahiyom.

Subli niyang gipamahayag nga wala gyud manguyab si Janno Gibbs niya hinungdan nga naglibog siya nganong dunay tsismis nga siya maoy nakaingon sa panagbuwag sa komedyante ug sa asawa niini nga si Bing Loyzaga.

Matud niya nga hangtud karon wala pa siyay uyab apan duna hinuoy mga nagsige og padala og text messages nga walay hinungdan o mga pacute lang apan wala pay nakapapitik sa iyang kasingkasing sa ingon iyang sugton.

Si Jericho Rosales maoy iyang crush sa pagkakaron sanglit matud pa niya naka gusto na siya sa aktor sukad pa niadtong bida pa ang naulahi ug si Kristine Hermosa sa soap opera nga Pangako Sayo."

Giangon niya nga kon papilion siya kanila ni Janno ug Kempee de Leon ang naulahi maoy iyang tugyanan sa iyang pagbati sanglit nanguyab gyud kini niya.

Si Christine kasamtangang makita sa SOP Gigsters matag Domingo samtang apil usab siya sa Love to Love Season 9 diin kauban niya ang mga Starstruck graduates nga sila si Jennylyn Mercado, Katrina Halili ug Dion Ignacio.