Heart mabdos og upat ka buwan?

Dako rong pangutana didto sa showbiz circle sa Manila kon si Heart Evangelista ba ang gipasabot sa mga blind items nga mikuyanap karon kalabot sa usa ka young star nga mabdos.

Mga usa na ka semana ang maong hagawhaw, diin matud pa sa taho ni Reggie Bonoan, kolumnista sa Pilipino Star Ngayon nga usa ka barkada ni Heart ang namahayag nga dunay dakong problema karon ang aktres.

Gikatahong niangkon si Heart ngadto sa iyang amiga nga duna siyay dako nga suliran sa pagkakaron sanglit matud pa upat siya ka buwan nga mabdos sa anak nila ni Jericho Rosales.

Suma pa nga gikatakda nga molupad paingon sa Estados Unidos si Heart aron adto ihimugso ang bata samtang hangtud karon padayon pa nga walay komentaryo ang kampo sa aktres.

Niadtong nakalabay nga semana dunay taho nga nagkanayon nga si Angelika dela Cruz na maoy napili sa Star Magic nga maoy modala sa papel nga Eden alang sa part two sa pantaseryeng Panday.

Wala idetalye sa kampo ni Angelika ang hinungdan sa mao niyang paghulip og igo lang giingon nga dunay " personal problem" si Heart hinungdan nga dili na siya mopadayon.

Hinoon dunay mga suod ngadto kang Angelika nga namahayag nga dili tinood nga si Angelika na ang bag-ong Eden sanglit usa ka bag-o nga salida ang giandam sa abs-cbn ngadto niya.

Ang katin-awan nga giluwatan sa mga higala ni Angelika kalabot sa bag-o nga show nadungan usab sa pagkaylap sa taho nga wala nay part two ang Panday sanglit dili na ganahan si Jericho nga mopadayon pa tungod kay priority niya nga mag-concentrate isip bokalista sa bag-o niyang banda.