Tsansa ni Osang hinay

Giingong hinay ang tsansa ni Rossana Roces nga malakip sa mga housemates sa umaabot nga Pinoy Big Brother celebrity edition karong Enero tungod kay dili na kaayo interesado ang ABS-CBN kaniya.

Ning bag-o lang ang director sa maong show nga si Laurenti Dyogi namahayag nga wala pa nila ma- finalize kinsa ang nakapasar sa audition ug dili pa usab niya masiguro nga maapil si Osang.

Nabantayan sa mga tsismosa didto sa kauluhan nga bugnaw ang pagtagad sa Kapamilya network karon ngadto kang Osang kinsa karon namasin nga mabanhaw pagbalik ang nihupas nga ka sikat human gilabhan og maayo sa kontrobersya kaniadto.

Nasayran nga dunay rason ang ABS-CBN nga magduha-duha paghangop og balik kang Osang sanglit sa una pa nga wala pa siya mosikat contract star diay siya sa Kapamilya apan mibalitok paingon sa Kapuso network.

Mga insiders namahayag nga nabalaka ang ABS-CBN nga kon masulod og balik si Osang sa ilang nataran isip addition sa ilang roster of talents way pagpanuko nga sublion niini ang iyang pagpakigkontra kaniadto sa GMA-7.

Busa matud pa nga gihuna-huna pa og maayo sa mga kadagkuan sa ABS-CBN kon ila bang pasudlon pagbalik si Osang sa ilang ginharian pinaagi sa PBB sanglit kon malakip na isip housemates automatic man nga papirmahon na unya siya og management contract.

Daghang mga artista ang ni-audition alang sa celebrity edition sa PBB last week diin lakip sa nasigpatan didto sa ABS-CBN compound mao silang Katrina Paula, Joanne Quintas ug Roxie Barcelo gawas pa sa mga sikat nga models.