Ai-ai babagan sa mga Vilmanians ug Noranians

Nahimuot si comedy queen Ai-ai delas Alas sa reaction sa mga Vilmanians ug Noranians kalabot sa hugtanon nilang pagsupak sa taho nga ang nahisgutan maoy napili sa ABS-CBN alang sa remake sa "Bakekang."

Ang "Bakekang" man gud pelikula nga gigama ni Nora Aunor kaniadto busa dili buot ang mga Vilmanians nga si Ai-ai maoy magbida alang sa remake sanglit Vilmanian man usab ang naulahi.

Samtang ang mga Noranians usab supak kang Ai-ai for the simple reason nga siya usa ka Vilmanian hinungdan nga nahimuot ang comedy queen tungod sa maong mga reaction sanglit kon buot huna-hunaon walay mahimo ang duha ka kampo kon mahinayon gyud siya isip "Bakekang".

Si Ai-ai maoy bida sa episode nga "Poso" nga lakip sa tulo ka mga estorya sa "Shake Rattle and Roll" 25k nga gigama sa Regal Films ug entry sa umaabot nga Metro Manila Film Festival karong December 25.

Samtang no comment si Ai-ai kalabot sa iyang pag-audition sa Pinoy Big Brother tungod kay nahadlok siya nga masohong unya ang resulta ug dili na gyud hinoon siya malakip sa celebrity housemates.

No comment usab si Ai-ai sa pag-audition ni Osang ug sa posibilidad nga magkauban sila sa sulod balay ni Kuya balig 45 days gumikan kay dili na siya buot nga matuki pa pag-usab ang medyo dili maayo nila nga pagsinabtanay sa kanhi Sex Goddess kaniadto.