Russel Crowe mi-plead guilty

Mi-plead guilty niadtong Biyernes ang Academy Award-winning actor Russel Crowe para mapaubsan ang gipasakang "misdemeanor" nga kaso batok kaniya tungod sa iyang paghapak gamit ang telepono ngadto sa usa ka hotel clerk niadtong buwan sa Hunyo niining tuiga.

Si Crowe gipamulta og $160 sa maong insidente.

Si Crowe kinsa star sa pelikulang "A Beautiful Mind" ug Gladiator" gihatagan og conditional discharge ni Manhattan Criminal Court Judge Kathryn Freed ug gibauran kini nga kinahanglan dili maaresto sulod sa usa ka tuig.

Si Crowe uban sa iyang asawa mitungha sa korte diin giangkon niini ang gibuhat nga insidente.

Ang actor mag-atubang og usa ka tuig nga pagkapriso sa reduced charges niini diin felony assault ug criminal possession of weapon ang original charges batok kaniya nga dunay silot nga pito ka tuig nga pagkabilanggo kung mapamatud-an kining sad-an.

Ang abogado ni Crowe nga si Gerald Lefcourt nagkanayon nga kung maaresto sa umaabot nga tuig ang iyang kleyente ang original nga silot maoy iyang serbisyohan apan gitagaan kini og kagawasan karon nga makabiyahe ug makatrabaho ngadto sa Amerika.