Nadine Samonte wala magbiga-biga

Hugtanong gipanghimakak sa sikat nga Starstruck avenger Nadine Samonte ang intriga nga labihan niya nga makahawok sa giingong iyang uyab bisan og atubangan sa kadaghanan.

Bag-o lang nakulbaan ang mga fans ni Nadine gumikan kay basin og tungod sa maong intriga maapektuhan ang bag-o nga show niini sa QTV11 nga giulohan og "My Guardian Abby" matag Martes sa gabii.

Kini tungod kay kon tinood nga labihan ni nga PDA or Public Display of Affection then opposite kaayo siya sa papel sa usa ka anghel nga maoy iyang role sa bag-o niya nga show.

Nikisi-kisi intawon si Nadine dungan sa pag-ingon nga dili gyud tinood ang maong intriga tungod kay dili pa niya uyab ang giingong Filipino Chinese nga batan-on nga kanunay'ng magsunod sunod niya.

Matud ni Nadine nga nangulitawo pa lang ang maong batan-on kaniya apan wala pa siyay plano nga sugton kini sanglit priority niya ang iyang showbiz career.

Naglibog si Nadine nganong nitumaw ang maong intriga apan wala na lang siya mo-react sanglit suma pa niya ingon niini ang sistema sa showbiz diin ang mga walay sala himoan og sayop busa mas maayo nga dili nalang kini tagdon after all there is no truth sa maong tsimax.