Bag-ong project ni Atty. Joji Alonzo

Dunay bag-ong project ang Cebuana nga producer nga si Atty. Joji Alonso, laing digital film nga ubos sa direksyon ni Jeffrey Jeturian, sa script ni Ralston Jover. Mahinumduman nga si direk Jeffrey Jeturian ang director sa gidayeg nga "Minsan Pa," binisaya nga pelikula ni Atty. Joji Alonzo nga gibitoonan nila ni Jomari Yllana ug Ara Mina, ubos sa kompaniya ni Atty. Alonzo nga MLR Films. Kataposang gihimo ni Atty. Alonzo mao ang gidayeg usab nga digital film nga nag-ulohan og "Pusang Gala," nga gibitoonan nila ni Ricky Davao, Irma Adlawan, Reggie Curley ug gipaila si Lauren Novero.

Nag-ulohan og "Ang Kubrador," bitoonan kini ni Gina Pareno isip kubrador sa Jueteng, ug may special participation sila si Ricky Davao ug Reggie Curley. Gamay ra ang role nila ni Ricky ug Curley. Sa pagka karon, daghan pa kaayog mga gipanghimo sila si Reggie ug Ricky ug nagpasalamat sila nga dili kaayo taas ang ilang role sa "Ang Kubrador" kay kon nataas pa, maglisod na gyod sila sa ilang mga schedules.