Grabe gyod ka hectic ang schedule ni Dulce

Gipangutana ni Bryan Cabase si Dulce kon unsay latest nga musical nga iyang giapilan human sa "Himala" sa miaging tuig (human sa adlaw sa mga minatay) ug miingon si Dulce nga wa pa gyo'y laing musical nga gidawat ang iyang manager (Anggie Magbanua sa Great Entertainment) tungod sa ka hectic sa iyang mga schedule, gawas sa lain pang hinungdan nga ang musical, gamay ra og bayad, pila pa gyod ka adlaw ang rehearsals.

Gani, niadtong pag-anhi ni Dulce uban sa iyang banay, gikan pa siya sa Bangkok, misalikyat sa Davao City uban kanila ni Ivy Violan ug Sarah Balabagan unya, sa buntag niadtong Oktobre 29 nag-show pa siya sa mga sakop sa mga negosyanteng mga Hapon.

Gusto unta sa mga Hapon nga gabii ang show, apan na-schedule na ni Dulce ang pagkanta niya sa kasal nilang Gabriel Aguilar ug Nice Dinaoanao sa Redemptorist Church ug sa reception sa Grand Convention Center pagka hapon ug sa among reunion busa mihukom ang mga Hapon nga buntag na lang ang show ug human sa show, misakay dayon si Dulce sa PAL (apan delayed ang flight, wa makaabot si Dulce sa kasal sa Redemptorist), busa didto na lang siya sa reception. Pagka ugma na, Oktobre 30 ang among reunion.