Duha ka hosts sa Oi, pulihan?

Gihuhungihong nga pulihan ang duha ka hosts sa labing bag-o nga show sa GMA-7 Cebu nga giolohan og "Oi" gumikan sa nagkalain-laing hinungdan.

Ang gikatahong hulipan mao ang accounting student part-time model nga si Ariane ug ang basketball player sa M Lhuiller nga si Marti.

Ang tsika nga nadawat sa Banat Entertainment niadtong Huwebes sa hapon nagkanayon nga mobiya na si Marti sa show tungod kay nadawat na kini isip kadete sa U.S Navy.

Samtang dili klaro kon unsay rason nganong lakip si Ariane pulihan usab tungod kay ang taho igo lang niingon nga sa lima ka pioneering hosts si Yuri, Eguia ug Recca na lang ang magpabilin.

Apan ang station manager sa GMA-7 Cebu nga si Anna Marie Tan daling nanghimakak sa maong taho tungod kay matud niya dili gyud kini tinood.

"Of course not my dear. Ariane is not in the second episode because she had to study for her finals during the shoot. Marti just finished a segment last night featuring MTV naman," pong pa ni Tan sa iyang text message nga gipada sa Banat Entertainment.

Ang "Oi" usa ka interactive show nga nagsugod niadtong Domingo isip hulip sa "Singgit Cebu" ug maoy kaatbang sa Jud Morning -talk show ni Jude Bacalso sa abs-cbn Cebu.