Ai-ai naglagot kang Rainier Castillo

Niulbo ang kaspa as in gisapot ang comedy queen nga si Ai-ai delas Alas kang Starstruck graduate Rainier Castillo gumikan kay super late nga nibutho sa shooting ang naulahi.

Ang duruha puro kabahin sa pelikulang "Shake Rattle and Roll" nga gigama ubos sa Regal Films nga ang shooting nagpadayon didto sa Antipolo.

Matud pa nga ang call time alas onse sa buntag busa didto na si Ai-ai daan sa wala pa ang gikatakdang oras samtang anino nalang ni Rainier wala gyud mopatim-aw.

Namuti nalang ang mata sa comedy queen og pinaabot apan walay Rainier nga nagpakita busa nakahukom siya pagsukit sukit sa production staff hain na ang batan-on nga charmer.

Nasayran sa aktres nga duna pay laing shooting si Rainier alang sa usa ka show sa GMA-7 hinungdan nga wala kini mopatim-aw samputanan sa kasapot ni Ai-ai.

Naglagot ang comedy queen gumikan kay alang kaniya labihan ka unprofessional ang gibuhat sa aktor busa sa dihang miabot na ang young star pasado na alas otso sa gabii wala malikayi ni Ai-ai ang pagkasaba niini.

Nahusay ra usab ang tensyon gumikan kay nagpaubos man si Rainier pinaagi sa pagpangayo og pasaylo ngadto sa aktres.